អគ្គិភ័យបានឆាបឆេះអគារពាណិជ្ជកម្ម១កន្លែង នៅប្រទេសថៃ ស្លាប់១១នាក់!

ប៉ូលិសថៃ បានឱ្យដឹងថា អគ្គិភ័យដែលឆាបឆេះអគារពាណិជ្ជកម្ម កម្ពស់៤ជាន់នៅលើកោះទេសចរណ៍ភូកេត ប្រទេសថៃ កាលពីព្រឹកព្រលឹមថ្ងៃចន្ទទី១៦ ខែវិច្ឆិកា ឆ្នាំ២០២៦ បានសម្លាប់មនុស្ស១១នាក់ និងធ្វើឱ្យមនុស្ស១៦ នាក់ផ្សេងទៀតរងរបួស។

សារព័ត៌មានCNA។

មន្ត្រីប៉ូលិសមួយរូបនៅតំបន់ប៉ាតុង (Patong)ខេត្តភូកេត បានប្រាប់ទីភ្នាក់ងារសារព័ត៌មានAFP ថា ហេតុការណ៍នេះ បានចាប់ផ្តើមនៅម៉ោងប្រហែល ៣:និង៣០នាទី ទៀបភ្លឺ ឈានចូលថ្ងៃទី១៦.១១.២០២៦។
នៅក្នុងអគារពាណិជ្ជកម្មមួយ ដែលមានភោជនីយដ្ឋាន និងបន្ទប់ជួលស្នាក់នៅ។

មន្ត្រីរូបនោះ បាននិយាយទៀតថា កម្លាំងពន្លត់អគ្គិភ័យ បានចំណាយពេល ២ម៉ោង ដើម្បីគ្រប់គ្រងស្ថានការណ៍ ហើយបានរកឃើញសាកសពមនុស្ស ១១នាក់ ដែលក្នុងនោះមានទាំងជនជាតិថៃ និងជនជាតិមីយ៉ាន់ម៉ា.!។

មន្ត្រីរូបនេះបញ្ជាក់ថា មូលហេតុនៃអគ្គិភ័យកំពុងស្ថិតក្រោមការស៊ើបអង្កេត លោកបានសុំមិនបញ្ចេញឈ្មោះ ដោយសារមិនមានសិទ្ធិផ្តល់ព័ត៌មានដល់ប្រព័ន្ធផ្សព្វផ្សាយ។

យោងតាមប្រព័ន្ធផ្សព្វផ្សាយ ក្នុងស្រុក អគ្គិភ័យបានចាប់ផ្តើមឆេះនៅហាងជួលម៉ូតូមួយកន្លែង មុននឹងរាលដាលទៅកាន់ផ្នែកផ្សេងទៀតនៃអគារ។

លោកបានបន្ថែមថា មនុស្ស ១៦នាក់ត្រូវបានបញ្ជូនទៅព្យាបាលនៅមន្ទីរពេទ្យ ដោយសារការស្រូបផ្សែងពុល និងរងរបួសដោយសារកញ្ចក់បែក។
ទីភ្នាក់ងារសារព័ត៌មាន Reuters បានដកស្រង់សម្តីប៉ូលិសថា ក្នុងចំណោមអ្នកស្លាប់ និងអ្នករងរបួសទាំងនោះ មិនមានភ្ញៀវទេសចរបរទេសឡើយ។

ការអនុវត្តបទប្បញ្ញត្តិស្តីពីសុខភាព និងសុវត្ថិភាពនៅប្រទេសថៃ ជាពិសេសនៅក្នុងបារ និងក្លឹបរាត្រីនានា គឺជាបញ្ហាដែលគួរឱ្យព្រួយបារម្ភយូរហើយ.!។

អាជ្ញាធរបានឱ្យដឹងថា កាលពីខែកក្កដា បារមួយកន្លែង នៅទីក្រុងបាងកក ដែលមានមនុស្សយ៉ាងច្រើនកុះករ បានឆេះយ៉ាងសន្ធោសន្ធៅ ដោយសារផ្សែងនិងអណ្តាតភ្លើង បណ្តាលឱ្យមនុស្សប្រហែល ៤០នាក់ស្លាប់ ដោយសារបញ្ហាឆ្លងចរន្តអគ្គិសនី។

កាលពីឆ្នាំ២០០៩ អគ្គិភ័យមួយបានឆាបឆេះក្លឹប១កន្លែង ក្នុងទីក្រុងបាងកក អំឡុងពេលពិធីអបអរសាទរឆ្នាំថ្មី ដែលបានសម្លាប់មនុស្ស ៦៧នាក់ និងធ្វើឱ្យមនុស្សជាង ២០០នាក់រងរបួស៕

Leave a Reply

Your email address will not be published. Required fields are marked *

Exit mobile version