គណបក្សស្តាំនិយមជ្រុល Vlaams Belang នៅប្រទេសបែលហ្ស៊ិក បានប្រកាសថា ខ្លួននឹងដាក់ញត្តិមិនទុកចិត្តរដ្ឋាភិបាលសហព័ន្ធ បន្ទាប់ពីការចរចាលើកិច្ចព្រមព្រៀងថវិកាបានបរាជ័យ និងបង្កឱ្យមានភាពជាប់គាំងផ្នែកនយោបាយ។
សារព័ត៌មានAnadolu Agency។
បញ្ហានេះកើតឡើងក្រោយគណបក្សសង្គមនិយមហ្វ្លេមីស Vooruit បានបដិសេធសំណើថវិកាដែលបានដាក់ចេញ ដោយសារមិនអាចសម្រេចបាននូវការកែប្រែដែលខ្លួនចង់បាន ដើម្បីធ្វើឱ្យថវិកាមានភាពយុត្តិធម៌ជាងមុន។
នាយករដ្ឋមន្ត្រី Bart De Wever បានជូនដំណឹងដល់ព្រះមហាក្សត្រ Philippe ថា គណបក្សចម្រុះក្នុងរដ្ឋាភិបាលមិនអាចដោះស្រាយការខ្វែងគំនិតគ្នាបានទេ ប៉ុន្តែនៅតែមានឆន្ទៈបន្តចរចាដើម្បីស្វែងរកដំណោះស្រាយរួម។
ជាការឆ្លើយតប ព្រះមហាក្សត្រ Philippe បានស្នើឱ្យនាយករដ្ឋមន្ត្រីបន្តការចរចាឱ្យបានឆាប់ ដើម្បីជៀសវាងវិបត្តិនយោបាយ និងវិបត្តិថវិកាដែលអាចប៉ះពាល់ដល់ប្រទេស។ លោក De Wever ត្រូវរាយការណ៍លទ្ធផលជូនព្រះមហាក្សត្រវិញនៅថ្ងៃទី២៣ ខែវិច្ឆិកា ឆ្នាំ២០២៦។
ទោះជាយ៉ាងណា ញត្តិមិនទុកចិត្តរដ្ឋាភិបាលរបស់គណបក្ស Vlaams Belang ត្រូវបានគេរំពឹងថា នឹងមិនទទួលបានការគាំទ្រគ្រប់គ្រាន់ឡើយ ព្រោះគណបក្សផ្សេងៗបានបដិសេធមិនសហការជាមួយគណបក្សនេះ។
ស្ថានការណ៍នេះកំពុងបង្កើនសម្ពាធលើរដ្ឋាភិបាលបែលហ្ស៊ិក ខណៈសហជីពគ្រោងធ្វើកូដកម្ម និងបាតុកម្មនៅទីក្រុងប្រ៊ុចសែល នៅថ្ងៃទី២៣ ខែវិច្ឆិកា ដើម្បីបង្ហាញការមិនពេញចិត្តចំពោះស្ថានភាពនយោបាយ និងសេដ្ឋកិច្ច៕

