(ហ្វីលីពីន)៖ កិច្ចប្រជុំកំពូលអាស៊ានលើកទី៤៩ ដែលមានប្រទេសហ្វីលីពីន ជាប្រធានប្តូរវេនឆ្នាំ២០២៦ បានបិទបញ្ចប់ហើយនៅរសៀលថ្ងៃអង្គារ ទី១៧ ខែវិច្ឆិកា ឆ្នាំ២០២៦។
ពិធីបិទកិច្ចប្រជុំកំពូលអាស៊ានលើកទី៤៩ បានប្រព្រឹត្តទៅយ៉ាងមហោឡារិក ដោយមានការអញ្ជើញចូលរួមពីសម្តេចមហាបវរធិបតី ហ៊ុន ម៉ាណែត ព្រមទាំងមេដឹកនាំប្រទេសដទៃទៀតជាសមាជិកអាស៊ាន។
លោក ហ្វែឌីណាន់ ម៉ាកូស ប្រធានាធិបតីហ្វីលីពីន និងជាប្រធានអាស៊ាន។
បានកត់សម្គាល់នូវសមិទ្ធផលមួយចំនួន ដែលអាស៊ាន សម្រេចបានក្នុងឆ្នាំ២០២៦ ហើយក៏បានរំលេចពីបញ្ហាមួយចំនួនរបស់អាស៊ាន ដែលទាមទារឱ្យមានការរួមគ្នាជាចាំបាច់ក្នុងការដោះស្រាយ។
លោកប្រធានាធិបតី បានលើកជាសំណួរថា តើត្រូវធ្វើយ៉ាងណា ដើម្បីឱ្យអាស៊ានខ្លាំង? សម្រាប់លោកប្រធានាធិបតី ដើម្បីអាស៊ានខ្លាំង គឺត្រូវរួមគ្នា។
លោកប្រធានាធិបតី បានលើកឡើងថា ពេញមួយឆ្នាំ២០២៦ ហ្វីលីពីនបានព្យាយាមធ្វើជាត្រីវិស័យដើម្បីផ្តល់ទិសដៅភាពជាអ្នកដឹកនាំ និងសាមគ្គីភាព។
លោកបានសង្កត់ធ្ងន់ថា ការផ្លាស់ប្តូរយុទ្ធសាស្ត្រនៅពេលចាំបាច់ មិនមែនជាការបាត់បង់ទិសដៅនោះទេ ហើយអាស៊ាននៅតែបន្តពង្រឹងសន្តិភាព ស្ថិរភាព ការតភ្ជាប់សេដ្ឋកិច្ច និងការការពារប្រជាជនទោះបីជាស្ថានភាពពិភពលោកមានការប្រែប្រួលក៏ដោយ។
លោកប្រធានាធិបតី បញ្ជាក់ថា បញ្ហាប្រឈមរបស់អាស៊ានកាន់តែមានទំនាក់ទំនងគ្នា ដោយលោកបានលើកឧទាហរណ៍ថា សន្តិសុខថាមពល ក៏ជាសន្តិសុខសេដ្ឋកិច្ចដែរ។
អាស៊ានកាន់តែរឹងមាំ នឹងជួយកសាងពិភពលោកឱ្យកាន់តែមានស្ថិរភាព និងវិបុលភាព។
ក្នុងពិធីនោះ ក៏មានពិធីប្តូរញញរទៅកាន់លោក ឡរ៉េន វ៉ុង នាយករដ្ឋមន្ត្រីសិង្ហបុរី ដែលនឹងត្រូវធ្វើជាប្រធានអាស៊ានប្តូរវេនបន្តនៅឆ្នាំ២០២៧។
លោកប្រធានាធិបតីហ្វីលីពីន បានបញ្ជាក់ថា នៅពេលអាស៊ានឈានចូលដល់ខួបលើកទី៦០ នៅឆ្នាំ២០២៧ វាជាពេលវេលាដ៏ស័ក្តិសមដែលសិង្ហបុរីត្រូវកាន់ចង្កូតដឹកនាំ។
លោកបានបង្ហាញទំនុកចិត្តយ៉ាងមុតមាំថា សិង្ហបុរី នឹងដឹកនាំអាស៊ានប្រកបដោយភាពច្បាស់លាស់ ស្ថិរភាព និងការប្តេជ្ញាចិត្តខ្ពស់ចំពោះកិច្ចសហប្រតិបត្តិការក្នុងតំបន់។
ក្នុងពិធីនោះ លោក វ៉ុង បានអំពាវនាវឱ្យអាស៊ានបោះជំហានបន្ថែមទៀតឆ្ពោះទៅរកទីផ្សារតែមួយ (Single ASEAN market) ដើម្បីឱ្យអាជីវកម្មអាចដំណើរការឆ្លងដែនដោយរលូន និងបង្កើតឱកាសការងារ និងការវិនិយោគកាន់តែច្រើន។
លោកសង្កត់ធ្ងន់ លើការពង្រឹងទំនាក់ទំនងក្នុងវិស័យហិរញ្ញវត្ថុ បច្ចេកវិទ្យាឌីជីថល បញ្ញាសិប្បនិម្មិត (AI) និងការពន្លឿនការផ្លាស់ប្តូរទៅរកថាមពលស្អាត។
លោកបញ្ជាក់ថា អាស៊ានត្រូវតែបន្តកសាងស្ពានទំនាក់ទំនង និងរក្សាជំហរបើកចំហ។
លោកបានកត់សម្គាល់ពីខួបអនុស្សាវរីយ៍សំខាន់ៗនៅឆ្នាំ២០២៧ រួមមានខួបលើកទី៥០ នៃទំនាក់ទំនងអាស៊ានជាមួយសហរដ្ឋអាមេរិក កាណាដា និងសហភាពអឺរ៉ុប ព្រមទាំងខួបលើកទី៣០ នៃអាស៊ានបូកបី ដែលជាឱកាសក្នុងការពង្រឹងកិច្ចសហប្រតិបត្តិការជាក់ស្តែង៕

