សហភាពអឺរ៉ុប ដាក់ទណ្ឌកម្មលើក្រុមក្មេងទំនើងចំនួន៤ក្រុមនៅហៃទី ពាក់ព័ន្ធនឹងការរំលោភសិទ្ធិមនុស្សធ្ងន់ធ្ងរ!

សហភាពអឺរ៉ុប (EU) កាលពីថ្ងៃចន្ទ ទី១៦ ខែវិច្ឆិកា ឆ្នាំ២០២៦ បានដាក់ទណ្ឌកម្មលើក្រុមឧក្រិដ្ឋជនប្រដាប់អាវុធចំនួន ៤ក្រុមនៅប្រទេសហៃទី ដោយសារពាក់ព័ន្ធនឹងការរំលោភសិទ្ធិមនុស្សធ្ងន់ធ្ងរ ជាពិសេសអំពើហិង្សាលើកុមារ រួមមានការសម្លាប់ ការរំលោភផ្លូវភេទ និងការបង្ខំកុមារឱ្យចូលរួមជាកងកម្លាំងប្រដាប់អាវុធ។
សារព័ត៌មានReuter។

ក្រុមទាំង៤ដែលត្រូវបានដាក់ទណ្ឌកម្មរួមមាន 5 Segond, Gran Ravine, 400 Mawozo និង Krazé Baryè។ ក្រុមទាំងនេះត្រូវបានចោទប្រកាន់ពីបទប្រើអំពើហិង្សាលើកុមារ សម្លាប់មនុស្ស រំលោភផ្លូវភេទ និងវាយប្រហារលើមណ្ឌលសុខាភិបាល។
ក្រោមវិធានការដាក់ទណ្ឌកម្មនេះ ទ្រព្យសម្បត្តិរបស់ក្រុមទាំងនោះនៅក្នុងតំបន់ដែលពាក់ព័ន្ធនឹងសហភាពអឺរ៉ុប នឹងត្រូវបង្កក ហើយសមាជិកក្រុមទាំងនេះក៏ត្រូវហាមឃាត់មិនឱ្យធ្វើដំណើរចូលទៅក្នុងសហភាពអឺរ៉ុបផងដែរ។ ពលរដ្ឋ និងក្រុមហ៊ុននៅសហភាពអឺរ៉ុបក៏មិនអាចផ្តល់ប្រាក់ ឬជំនួយហិរញ្ញវត្ថុដល់ក្រុមទាំងនេះបានដែរ។
កាលពីខែកុម្ភៈ ឆ្នាំ២០២៦ អង្គការសហប្រជាជាតិបានរាយការណ៍ថា ចំនួនកុមារដែលត្រូវបានជ្រើសរើសឱ្យចូលរួមក្នុងក្រុមក្មេងទំនើងនៅហៃទី បានកើនឡើងយ៉ាងគួរឱ្យព្រួយបារម្ភ និងបង្កផលប៉ះពាល់យ៉ាងធ្ងន់ធ្ងរដល់កុមារ គ្រួសារ និងសង្គមទាំងមូល។
ជាមួយគ្នានេះ អង្គការសហប្រជាជាតិបានបញ្ជាក់ថា អំពើហិង្សាទូទាំងប្រទេសហៃទីបានបណ្តាលឱ្យមនុស្សជាង ១.១៦០នាក់ស្លាប់ ចន្លោះពីខែកក្កដា ដល់ខែកញ្ញា ឆ្នាំ២០២៦ ក្នុងនោះក៏មានកុមារជាច្រើននាក់ផងដែរ៕

Leave a Reply

Your email address will not be published. Required fields are marked *

Exit mobile version