អ៊ីស្រាអែល បើកប្រតិបត្តិការយោធានៅតំបន់កណ្តាលហ្គាហ្សា ទោះមានបទឈប់បាញ់ក៏ដោយ!

កងទ័ពអ៊ីស្រាអែលបានប្រកាសបើកប្រតិបត្តិការយោធានៅតំបន់ចំនួន៣ ក្នុងភាគកណ្តាលនៃតំបន់ហ្គាហ្សា កាលពីថ្ងៃទី១៨ ខែវិច្ឆិកា ឆ្នាំ២០២៦ ទោះបីមានបទឈប់បាញ់ចាប់តាំងពីថ្ងៃទី១០ ខែតុលា ឆ្នាំ២០២៥ក៏ដោយ។
សារព័ត៌មានAnadolu Agency។

យោធាអ៊ីស្រាអែលបានអះអាងថា ប្រតិបត្តិការនេះមានគោលដៅវាយប្រហារហេដ្ឋារចនាសម្ព័ន្ធដែលខ្លួនចាត់ទុកថាជាទីតាំងភេរវកម្ម នៅជិតខ្សែបន្ទាត់លឿង (Yellow Line)។ ក្នុងអំឡុងពេលប្រតិបត្តិការ អ៊ីស្រាអែលក៏បានបិទផ្នែកខ្លះនៃផ្លូវសាឡាហ៍ អាល់ឌីន និងបានអំពាវនាវឱ្យប្រជាជនប៉ាឡេស្ទីននៅឱ្យឆ្ងាយពីតំបន់នោះ។

យោងតាមក្រសួងសុខាភិបាលហ្គាហ្សា ចាប់តាំងពីបទឈប់បាញ់ចូលជាធរមាន ការរំលោភបំពានរបស់អ៊ីស្រាអែលបានបណ្តាលឱ្យប្រជាជនប៉ាឡេស្ទីនស្លាប់ ១.៦៥០នាក់ និងរងរបួស ៥.៩៧៥នាក់។

គួរបញ្ជាក់ថា ចាប់តាំងពីខែតុលា ឆ្នាំ២០២៣ មក សង្គ្រាមនៅតំបន់ហ្គាហ្សាបានបណ្តាលឱ្យប្រជាជនប៉ាឡេស្ទីនស្លាប់ជាង ៧៤.០០០នាក់ និងរងរបួសជាង ១៧៦.០០០នាក់។ លើសពីនេះ ហេដ្ឋារចនាសម្ព័ន្ធប្រមាណ ៩០% ត្រូវបានបំផ្លាញ ឬខូចខាត ហើយអង្គការសហប្រជាជាតិប៉ាន់ប្រមាណថា ការស្តារឡើងវិញត្រូវការថវិកាប្រមាណ ៧១,៤ពាន់លានដុល្លារ៕

Leave a Reply

Your email address will not be published. Required fields are marked *

Exit mobile version