កាលពីថ្ងៃទី១៨ ខែវិច្ឆិកា ឆ្នាំ២០២៦ ប្រធានាធិបតីតួកគី លោក Recep Tayyip Erdogan បានថ្លែងថា ការសម្លាប់មនុស្ស ការធ្វើឃាត ការរើសអើង និងការបង្អត់អាហារ នៅតំបន់ហ្គាហ្សា នៅតែបន្តកើតឡើងស្ទើររាល់ថ្ងៃ ខណៈពិភពលោកកំពុងមើលឃើញស្ថានការណ៍នេះ។
សារព័ត៌មានAnadolu Agency។
ថ្លែងក្នុងកិច្ចប្រជុំគណបក្សកាន់អំណាចនៅទីក្រុងអង់ការ៉ា លោក Erdogan បានចោទប្រកាន់អ៊ីស្រាអែលថា បានប្រែក្លាយតំបន់ហ្គាហ្សាទៅជា «ជំរុំឃុំឃាំងដ៏ធំបំផុតលើពិភពលោក»។
លោកក៏បានព្រមានថា វិបត្តិមនុស្សធម៌នៅហ្គាហ្សាអាចកាន់តែធ្ងន់ធ្ងរ នៅពេលរដូវរងាចូលមកដល់ ជាពិសេសចំពោះកុមារ និងគ្រួសារដែលកំពុងរស់នៅក្នុងជម្រកលិចទឹក និងភក់ ដោយគ្មានទីជម្រកគ្រប់គ្រាន់សម្រាប់ការពារភាពត្រជាក់។
លោក Erdogan បានអំពាវនាវឱ្យប្រទេសមូស្លីមទាំងអស់រួមគ្នាចាត់វិធានការ និងបង្កើនសម្ពាធលើអ៊ីស្រាអែល ព្រមទាំងបង្កើនជំនួយមនុស្សធម៌ទៅកាន់ប្រជាជនហ្គាហ្សា មុនពេលស្ថានភាពរដូវរងាកាន់តែអាក្រក់។ លោកក៏បានបញ្ជាក់ថា តួកគីត្រៀមបញ្ជូនសម្ភារៈជំនួយ និងបន្តជួយប្រជាជនប៉ាឡេស្ទីន ទោះបីត្រូវធ្វើសកម្មភាពតែម្នាក់ឯងក៏ដោយ។
ជាមួយគ្នានេះ លោកបានព្រមានពីអស្ថិរភាពនយោបាយពិភពលោកដែលកំពុងកើនឡើង ដោយលើកឡើងពីសង្គ្រាមរវាងរុស្ស៊ី និងអ៊ុយក្រែន ព្រមទាំងភាពតានតឹងនៅតំបន់ឈូងសមុទ្រពែក្ស ដែលកំពុងបង្កើនការប្រកួតប្រជែងផ្នែកភូមិសាស្ត្រនយោបាយអន្តរជាតិ៕

