កាលពីថ្ងៃទី១៨ ខែវិច្ឆិកា ប្រធានាធិបតីអ៊ុយក្រែន លោក Volodymyr Zelenskyy បានលើកឡើងថា សង្គ្រាមរវាងរុស្ស៊ី និងអ៊ុយក្រែនអាចបញ្ចប់បានត្រឹមកិច្ចប្រជុំត្រីភាគីតែមួយ រវាងប្រធានាធិបតីអាមេរិក លោក Donald Trump ប្រធានាធិបតីរុស្ស៊ី លោក Vladimir Putin និងប្រធានាធិបតីចិន លោក Xi Jinping ប្រសិនបើមេដឹកនាំទាំងបីមានឆន្ទៈពិតប្រាកដក្នុងការបញ្ចប់សង្គ្រាម។
សារព័ត៌មានAnadolu Agency។
លោក Zelenskyy បាននិយាយថា អាមេរិក និងចិនមានឥទ្ធិពលគ្រប់គ្រាន់ក្នុងការដាក់សម្ពាធលើរុស្ស៊ី តាមរយៈការដាក់ទណ្ឌកម្ម ឬគំរាមដាក់ទណ្ឌកម្ម ដើម្បីបង្ខំឱ្យទីក្រុងមូស្គូបញ្ចប់សង្គ្រាម។ លោកក៏បានសង្កត់ធ្ងន់ថា គ្មានការសម្រេចចិត្តណាមួយពាក់ព័ន្ធនឹងអ៊ុយក្រែន អាចធ្វើឡើងដោយគ្មានការចូលរួមពីអ៊ុយក្រែនឡើយ ហើយបញ្ហារបស់អឺរ៉ុបក៏ត្រូវមានអឺរ៉ុបចូលរួមដែរ។
ការលើកឡើងនេះធ្វើឡើងមុនកិច្ចប្រជុំកំពូលត្រីភាគីរវាងមេដឹកនាំអាមេរិក រុស្ស៊ី និងចិន ដែលគ្រោងធ្វើឡើងនៅថ្ងៃទី១៩ ខែវិច្ឆិកា ក្នុងទីក្រុង Shenzhen ប្រទេសចិន។
ជាមួយគ្នានេះ លោក Zelenskyy បានស្វាគមន៍ផែនការរបស់សហភាពអឺរ៉ុប ដែលស្នើផ្តល់ជំនួយហិរញ្ញវត្ថុដល់អ៊ុយក្រែនរហូតដល់ ៤៥ ពាន់លានអឺរ៉ូ ស្មើនឹងប្រមាណ ៥២ ពាន់លានដុល្លារ ដើម្បីជួយទ្រទ្រង់ថវិកាជាតិ និងវិស័យការពារជាតិរបស់អ៊ុយក្រែននៅឆ្នាំ២០២៧។ លោកបានជំរុញឱ្យសភាអឺរ៉ុប និងក្រុមប្រឹក្សាសហភាពអឺរ៉ុបអនុម័តផែនការនេះឱ្យបានឆាប់។
លើសពីនេះ អ៊ុយក្រែនកំពុងរៀបចំវិធានការការពារនាវាដឹកជញ្ជូន និងកំពង់ផែនៅសមុទ្រខ្មៅ ព្រមទាំងត្រៀមជំនួយបន្ថែមសម្រាប់វិស័យកសិកម្ម និងការពារជាតិ ខណៈសង្គ្រាមនៅតែបន្ត៕

