អ៊ីស្រាអែល បើកប្រតិបត្តិការយោធានៅកណ្តាលតំបន់ហ្គាហ្សា ដោយមានការសម្របសម្រួលជាមួយអាមេរិក!

កងទ័ពអ៊ីស្រាអែលបានបើកប្រតិបត្តិការយោធានៅតំបន់កណ្តាលហ្គាហ្សា ដោយមានការសម្របសម្រួលជាមុនជាមួយសហរដ្ឋអាមេរិក ហើយប្រតិបត្តិការនេះអាចបន្តរយៈពេលជាច្រើនថ្ងៃ នេះបើយោងតាមវិទ្យុយោធាអ៊ីស្រាអែល កាលពីថ្ងៃទី១៨ ខែវិច្ឆិកា។
សារព័ត៌មានAnadolu Agency។

ប្រភពយោធាអ៊ីស្រាអែលបានឱ្យដឹងថា ប្រតិបត្តិការនេះមានគោលដៅបំផ្លាញផ្លូវរូងក្រោមដីមួយ ដែលអ៊ីស្រាអែលជឿថាអាចបង្កការគំរាមកំហែងដល់ទីតាំងយោធារបស់ខ្លួន។ ក្នុងប្រតិបត្តិការនេះ កងទ័ពអ៊ីស្រាអែលបានរុលចូលប្រហែល ៣០០ ទៅ ៤០០ ម៉ែត្រ ហួសពីខ្សែបន្ទាត់ពណ៌លឿង។

ការវាយលុកនេះបានបង្ខំឱ្យគ្រួសារប៉ាឡេស្ទីនជាច្រើននៅតំបន់កណ្តាលហ្គាហ្សា រត់ភៀសខ្លួនចេញពីផ្ទះសម្បែងជាថ្មីម្តងទៀត។ សាក្សីបានរាយការណ៍ថា រថយន្តយោធា និងគ្រឿងចក្រឈូសឆាយរបស់អ៊ីស្រាអែលបានរុលចូលតំបន់ Al-Mughraqa និងតំបន់ក្បែរជំរំជនភៀសខ្លួន Nuseirat ខណៈមានការបាញ់ប្រហារ និងផ្លោងកាំភ្លើងធំយ៉ាងខ្លាំង។

គួរបញ្ជាក់ថា នេះជាប្រតិបត្តិការយោធាលើកដំបូងប្រភេទនេះ ចាប់តាំងពីបទឈប់បាញ់រវាងអ៊ីស្រាអែល និងក្រុមហាម៉ាស ត្រូវបានប្រកាសកាលពីខែតុលា ឆ្នាំ២០២៥។ ខ្សែបន្ទាត់ពណ៌លឿងត្រូវបានកំណត់ឡើង ដើម្បីបែងចែកតំបន់ដែលកងទ័ពអ៊ីស្រាអែលឈរជើង និងតំបន់ដែលប្រជាជនប៉ាឡេស្ទីនអាចធ្វើដំណើរបាន។

តាមការប៉ាន់ស្មានក្នុងតំបន់ ការគ្រប់គ្រងរបស់អ៊ីស្រាអែលនៅតំបន់ហ្គាហ្សាបានកើនឡើងពីប្រហែល ៥៣% នៅពេលចាប់ផ្តើមបទឈប់បាញ់ ដល់ប្រហែល ៧០% នៃផ្ទៃដីទាំងមូលនៅខែតុលា ឆ្នាំ២០២៦៕

Leave a Reply

Your email address will not be published. Required fields are marked *

Exit mobile version