ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី បានថ្លែងកាលពីថ្ងៃទី១៩ ខែវិច្ឆិកា ឆ្នាំ២០២៦ ថាការចូលជាសមាជិកអង្គការណាតូ (NATO) គឺជាមធ្យោបាយធានាសន្តិសុខដ៏រឹងមាំបំផុតសម្រាប់អ៊ុយក្រែននិងអឺរ៉ុប។
សារព័ត៌មានAnadolu Agency។
ថ្លែងក្នុងសន្និសីទសារព័ត៌មាននៅទីក្រុងប៊ែរឡាំង ប្រទេសអាល្លឺម៉ង់ លោក ហ្សេឡេនស្គី បានអំពាវនាវឱ្យពន្លឿនដំណើរការបញ្ចូលអ៊ុយក្រែនជាសមាជិកពេញសិទ្ធិនៃសហភាពអឺរ៉ុប (EU) ដោយចាត់ទុកថា ការចូលជាសមាជិកនេះក៏ជាការធានាសន្តិសុខសម្រាប់ប្រទេសអឺរ៉ុបទាំងមូលផងដែរ។
លោកបានលើកឡើងថា ការរួមបញ្ចូលសមត្ថភាពយោធា បទពិសោធន៍ និងបច្ចេកវិទ្យារបស់អ៊ុយក្រែនជាមួយអង្គការណាតូ និងសហភាពអឺរ៉ុប នឹងជួយពង្រឹងសមត្ថភាពការពារសន្តិសុខនៅក្នុងតំបន់អឺរ៉ុប។
ជាមួយគ្នានេះ លោកបានបញ្ជាក់ថា អ៊ុយក្រែន និងសហរដ្ឋអាមេរិកបានឯកភាពគ្នាថា តំណាងអឺរ៉ុបគួរតែចូលរួមក្នុងការចរចានាពេលអនាគតជាមួយរុស្ស៊ី។
លោក ហ្សេឡេនស្គី បានស្នើឱ្យមានកិច្ចប្រជុំចរចា ៤ ភាគី ដែលរួមមាន អ៊ុយក្រែន អឺរ៉ុប សហរដ្ឋអាមេរិក និងរុស្ស៊ី ដើម្បីពិភាក្សារកដំណោះស្រាយសន្តិភាព។ លោកក៏បានជំរុញឱ្យភាគីទាំងអស់រួមគ្នាកំណត់របៀបវារៈនៃកិច្ចប្រជុំ និងដាក់សម្ពាធឱ្យរុស្ស៊ីចូលរួមចរចាដោយស្មោះត្រង់ និងមានខ្លឹមសារ ជាជាងពន្យារពេលដោយគ្មានលទ្ធផល៕

