គណៈវិនិច្ឆ័យនៅទីក្រុងឡូសអេនជឺឡេស សហរដ្ឋអាមេរិក បានរកឃើញបុរសអាយុ ៣០ឆ្នាំម្នាក់ឈ្មោះ Jonathan Rinderknecht មានទោសពីបទដុតបង្កឲ្យមានភ្លើងឆេះព្រៃ Palisades ដែលជាភ្លើងឆេះព្រៃដ៏ធ្ងន់ធ្ងរមួយក្នុងប្រវត្តិសាស្ត្ររដ្ឋកាលីហ្វ័រញ៉ា។
សារព័ត៌មានBBC នៅថ្ងៃទី២១ខែវិច្ឆិកា។
ភ្លើងឆេះនេះបានកើតឡើងនៅខែមករា ឆ្នាំ២០២៥ និងបានរាលដាលដល់តំបន់ Pacific Palisades និងផ្នែកខ្លះនៃតំបន់ Malibu បណ្តាលឱ្យមនុស្ស ១២នាក់ស្លាប់ និងអគារជាង ៦.៨០០ខ្នងត្រូវបានបំផ្លាញ។
តាមការស៊ើបអង្កេត លោក Rinderknecht បានដុតភ្លើងនៅថ្ងៃទី១ ខែមករា ឆ្នាំ២០២៥។ ភ្លើងដំបូងបានឆេះនៅក្រោមប្រព័ន្ធឫសរុក្ខជាតិ ដោយមិនត្រូវបានគេកត់សម្គាល់ ហើយបានផ្ទុះឡើងវិញយ៉ាងខ្លាំងក្នុងរយៈពេល៦ថ្ងៃក្រោយមក។
លោកត្រូវបានរកឃើញថាមានទោសលើបទចោទប្រកាន់សហព័ន្ធចំនួន២ ពាក់ព័ន្ធនឹងការបង្កភ្លើងឆេះដំបូង និងការខូចខាតដែលបណ្តាលមកពីភ្លើងឆេះឡើងវិញ។ លោកនឹងត្រូវចូលសវនាការកំណត់ទោសនៅថ្ងៃទី១៧ ខែមីនា ហើយអាចប្រឈមនឹងការជាប់ពន្ធនាគារពី៥ឆ្នាំ ដល់២០ឆ្នាំ សម្រាប់បទចោទប្រកាន់នីមួយៗ។
រដ្ឋអាជ្ញាបានលើកឡើងថា ជនជាប់ចោទអាចមានកំហឹង និងចង់សងសឹក ដោយសារតែគ្មានកន្លែងទៅស្នាក់នៅក្នុងអំឡុងថ្ងៃឈប់សម្រាក។ ពួកគេក៏បានប្រើទិន្នន័យទីតាំងពីទូរស័ព្ទ iPhone វីដេអូពីកាមេរ៉ាសុវត្ថិភាព និងសក្ខីកម្មរបស់សាក្សី ដើម្បីគាំទ្រការចោទប្រកាន់។
ទោះជាយ៉ាងណា មេធាវីការពារក្តីបានអះអាងថា ភស្តុតាងរូបវន្ត និងឯកសារដែលរដ្ឋអាជ្ញាប្រមូលបាន មិនគ្រប់គ្រាន់ដើម្បីបញ្ជាក់កំហុសរបស់កូនក្តីឡើយ។ ប៉ុន្តែគណៈវិនិច្ឆ័យបានសម្រេចផ្តន្ទាទោសលោក។
អភិបាលក្រុងឡូសអេនជឺឡេស លោកស្រី Karen Bass បានថ្លែងថា ការកាត់ទោសនេះមិនអាចនាំមនុស្សដែលបានស្លាប់ត្រឡប់មកវិញ ឬលុបបំបាត់ការឈឺចាប់របស់គ្រួសារជនរងគ្រោះបានទេ ខណៈប្រជាពលរដ្ឋជាច្រើននៅតែព្យាយាមស្តារលំនៅឋាន និងជីវភាពឡើងវិញ។
សូមបញ្ជាក់ថា ភ្លើងឆេះព្រៃនៅតំបន់ឡូសអេនជឺឡេសក្នុងខែមករា ឆ្នាំ២០២៥ បានកើតឡើងជាបន្តបន្ទាប់ បណ្តាលឱ្យមនុស្សសរុប ៣១នាក់ស្លាប់ និងបំផ្លាញសំណង់ប្រមាណ ១៦.០០០កន្លែង៕

