លោក ណារ៉េនដ្រា ម៉ូឌី ជំរុញឱ្យប្រទេសសមាជិកSCO ពង្រឹងការសន្ទនា និងទំនុកចិត្តគ្នាទៅវិញទៅមក!

នាយករដ្ឋមន្ត្រីឥណ្ឌា លោក ណារ៉េនដ្រា ម៉ូឌី កាលពីថ្ងៃសុក្រ ទី២០ ខែវិច្ឆិកា ឆ្នាំ២០២៦ បានអំពាវនាវឱ្យប្រទេសនានាពង្រឹងការសន្ទនា ទំនុកចិត្ត និងការរស់នៅដោយសុខដុមរមនា ខណៈលោកបានបើកវេទិកាសន្ទនាអរិយធម៌លើកដំបូងរបស់អង្គការសហប្រតិបត្តិការសៀងហៃ (SCO) នៅទីក្រុងញូវដែលី ប្រទេសឥណ្ឌា។
សារព័ត៌មានAnadolu Agency។

ក្នុងពិធីបើកវេទិការយៈពេល៣ថ្ងៃ លោក ម៉ូឌី បានលើកឡើងថា ការជឿទុកចិត្តគ្នាទៅវិញទៅមក គឺជាកត្តាសំខាន់បំផុតក្នុងការរក្សាសុខដុមរមនារវាងប្រទេសនានា។ លោកក៏បានជំរុញឱ្យប្រទេសទាំងអស់ផ្តោតលើចំណុចរួម ជាជាងភាពខុសគ្នា។

លោកបានលើកយកប្រទេសឥណ្ឌាជាឧទាហរណ៍ ដោយបញ្ជាក់ថា ទោះបីប្រជាជនមានភាសា របៀបរស់នៅ និងប្រពៃណីខុសៗគ្នាក៏ដោយ ក៏ពួកគេអាចរស់នៅរួបរួមគ្នាបាន តាមរយៈការទទួលស្គាល់ និងគោរពភាពចម្រុះ។

ជាមួយគ្នានេះ លោក ម៉ូឌី ក៏បានជំរុញឱ្យប្រទេសសមាជិក SCO ប្រើប្រាស់បច្ចេកវិទ្យាឌីជីថលឱ្យបានច្រើន ដើម្បីជួយសម្រួលដល់ការចែករំលែកចំណេះដឹង ការផ្លាស់ប្តូរវប្បធម៌ និងកិច្ចសហប្រតិបត្តិការអន្តរជាតិ។

វេទិកានេះត្រូវបានបង្កើតឡើងតាមសំណើរបស់លោក ម៉ូឌី កាលពីឆ្នាំ២០២៥ ក្នុងគោលបំណងពង្រឹងទំនាក់ទំនងវប្បធម៌ និងកិច្ចសហប្រតិបត្តិការរវាងប្រទេសសមាជិក។

គួរបញ្ជាក់ថា អង្គការ SCO ត្រូវបានបង្កើតឡើងក្នុងឆ្នាំ២០០១ ដោយប្រទេសចិន រុស្ស៊ី កាហ្សាក់ស្ថាន កៀហ្ស៊ីស៊ីស្ថាន តាហ្ស៊ីគីស្ថាន និងអ៊ូសបេគីស្ថាន។ បច្ចុប្បន្ន អង្គការនេះមានសមាជិកពេញសិទ្ធិចំនួន១០ប្រទេស។

ដោយឡែក រដ្ឋមន្ត្រីក្រសួងបម្រែបម្រួលអាកាសធាតុប៉ាគីស្ថាន លោក Musadik Masood Malik ក៏បានមកដល់ទីក្រុងញូវដែលី ដើម្បីចូលរួមវេទិកានេះផងដែរ។ នេះជាដំណើរទស្សនកិច្ចលើកដំបូងរបស់មន្ត្រីថ្នាក់រដ្ឋមន្ត្រីប៉ាគីស្ថានទៅកាន់ឥណ្ឌា ចាប់តាំងពីជម្លោះយោធារវាងប្រទេសទាំងពីរកាលពីឆ្នាំមុន។
វេទិកានេះមានគោលបំណងលើកកម្ពស់មរតកអរិយធម៌រួម ពង្រឹងទំនាក់ទំនងរវាងប្រជាជន និងជំរុញការសន្ទនា និងកិច្ចសហប្រតិបត្តិការឆ្លងវប្បធម៌៕

Leave a Reply

Your email address will not be published. Required fields are marked *

Exit mobile version