ប្រធានាធិបតីអាមេរិក លោក ដូណាល់ ត្រាំ បានថ្លែងកាលពីថ្ងៃសុក្រ ទី២០ ខែវិច្ឆិកា ឆ្នាំ២០២៦ ថា មេដឹកនាំប្រទេសសេដ្ឋកិច្ចធំៗទាំង២០ ត្រូវបានរំពឹងថានឹងចូលរួមកិច្ចប្រជុំកំពូល G20 នៅខែក្រោយ ដែលនឹងរៀបចំឡើងនៅរដ្ឋផ្លរីដាសហរដ្ឋអាមេរិក។
សារព័ត៌មានAnadolu Agency។
ថ្លែងក្នុងពិធីទទួលស្វាគមន៍ក្រុមតន្ត្រីកងម៉ារីនអាមេរិកនៅសេតវិមាន លោក ត្រាំ បានបញ្ជាក់ថា ក្រុមតន្ត្រីនេះនឹងសម្តែងជូនមេដឹកនាំពិភពលោកក្នុងឱកាសកិច្ចប្រជុំកំពូលខាងមុខ។ លោកបានសម្តែងក្តីសង្ឃឹមថា មេដឹកនាំសំខាន់ៗទាំងអស់នឹងចូលរួមក្នុងកិច្ចប្រជុំនេះ។
កិច្ចប្រជុំកំពូល G20 គ្រោងនឹងប្រព្រឹត្តទៅនៅថ្ងៃទី១៤ និង១៥ ខែធ្នូ ឆ្នាំ២០២៦ នៅទីក្រុងម៉ៃអាមី រដ្ឋផ្លរីដា ដោយមានការចូលរួមពីតំណាងប្រទេសដែលមានសេដ្ឋកិច្ចធំៗលើពិភពលោក ដើម្បីពិភាក្សាអំពីបញ្ហាសេដ្ឋកិច្ច និងសន្តិសុខអន្តរជាតិ។
ទោះជាយ៉ាងណា ការចូលរួមរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន នៅមិនទាន់មានភាពច្បាស់លាស់នៅឡើយទេ។ លោក ពូទីន ត្រូវបានអញ្ជើញឱ្យចូលរួម ប៉ុន្តែវិមានក្រឹមឡាំងមិនទាន់បញ្ជាក់ថា លោកនឹងធ្វើដំណើរទៅកាន់សហរដ្ឋអាមេរិក ឬបញ្ជូនតំណាងជំនួសនោះទេ។
សហរដ្ឋអាមេរិកបានបញ្ជាក់ថា រុស្ស៊ីត្រូវបានស្វាគមន៍ឱ្យចូលរួមក្នុងកិច្ចប្រជុំនេះ ក្នុងនាមជាសមាជិក G20។
ជាមួយគ្នានេះ លោក ត្រាំ ក៏បានប្រកាសផ្តល់ប្រាក់រង្វាន់ចំនួន ៥០០.០០០ដុល្លារ ដល់សមាជិកក្រុមតន្ត្រីកងម៉ារីនអាមេរិក ដើម្បីជាការលើកទឹកចិត្ត និងសរសើរចំពោះសមត្ថភាព និងការបម្រើការងាររបស់ពួកគេផងដែរ៕

