ក្រុមជួយសង្គ្រោះរកឃើញសាកសពនិងអដ្ឋិធាតុជនជាតិប៉ាឡេស្ទីន១២៩នាក់ទៀត ក្រោមគំនរបាក់បែកនៅតំបន់ហ្គាហ្សាកណ្តាល!

អាជ្ញាធរការពារជនស៊ីវិលហ្គាហ្សា បានឱ្យដឹងកាលពីថ្ងៃទី២១ ខែវិច្ឆិកា ថាក្រុមជួយសង្គ្រោះបានរកឃើញសាកសព និងអដ្ឋិធាតុជនជាតិប៉ាឡេស្ទីនចំនួន១២៩នាក់ទៀត នៅក្រោមគំនរបាក់បែកនៃផ្ទះ និងអគារចំនួន៣៩ ខ្នង ដែលត្រូវបានបំផ្លាញដោយការវាយប្រហាររបស់កងទ័ពអ៊ីស្រាអែល នៅតំបន់ហ្គាហ្សាកណ្តាល។
សារព័ត៌មានAnadolu Agency។

ប្រធានអាជ្ញាធរការពារជនស៊ីវិលប្រចាំតំបន់ហ្គាហ្សាកណ្តាល លោក រ៉ាមី អាល់អាយ៉េឌី បានឱ្យដឹងថា ប្រតិបត្តិការស្វែងរកនេះបានធ្វើឡើងនៅជំរំជនភៀសខ្លួន Nuseirat តំបន់ Al-Zawayda និងទីក្រុង Deir al-Balah។ ប្រតិបត្តិការនេះបានចំណាយពេល ៥៣ ថ្ងៃ ដោយប្រើប្រាស់ម៉ោងធ្វើការសរុប ៤១០ ម៉ោង ប៉ុន្តែមានគ្រឿងចក្រធុនធ្ងន់ត្រឹមតែមួយគ្រឿង និងរថយន្តដឹកកម្ទេចថ្មមួយគ្រឿងប៉ុណ្ណោះ។

អាជ្ញាធរបានបញ្ជាក់ថា មុនពេលចាប់ផ្តើមការស្វែងរក មានមនុស្សចំនួន ២៣៣ នាក់ត្រូវបានរាយការណ៍ថា បាត់ខ្លួននៅក្រោមគំនរបាក់បែក។

ទន្ទឹមនឹងនេះ អ្នកនាំពាក្យអាជ្ញាធរការពារជនស៊ីវិលហ្គាហ្សា លោក ម៉ាហ៍មូដ បាសាល់ បានឱ្យដឹងកាលពីខែតុលាថា នៅមានសាកសពប្រហែល ៨.០០០ នាក់ទៀតកប់នៅក្រោមគំនរបាក់បែកទូទាំងតំបន់ហ្គាហ្សា ក្នុងនោះប្រហែល ៤.០០០ នាក់ស្ថិតនៅតំបន់ដែលកងកម្លាំងអ៊ីស្រាអែលគ្រប់គ្រង ដែលធ្វើឱ្យក្រុមជួយសង្គ្រោះពិបាកចូលទៅដល់។

អាជ្ញាធរបានព្រមានថា ការរុករក និងយកសាកសពចេញអាចចំណាយពេលពី ៨ ទៅ ១០ ឆ្នាំ ប្រសិនបើនៅតែខ្វះខាតគ្រឿងចក្រដូចសព្វថ្ងៃ។

គួរបញ្ជាក់ថា បទឈប់បាញ់រវាងអ៊ីស្រាអែល និងប៉ាឡេស្ទីនបានចូលជាធរមាននៅថ្ងៃទី១០ ខែតុលា ឆ្នាំ២០២៥ បន្ទាប់ពីសង្គ្រាមអស់រយៈពេលពីរឆ្នាំ ដែលបានបណ្តាលឱ្យប្រជាជនប៉ាឡេស្ទីនរាប់ម៉ឺននាក់ស្លាប់ និងរងរបួស ព្រមទាំងបំផ្លាញហេដ្ឋារចនាសម្ព័ន្ធជាច្រើននៅហ្គាហ្សា។ ទោះជាយ៉ាងណា មន្ត្រីប៉ាឡេស្ទីនបានចោទប្រកាន់អ៊ីស្រាអែលថា មិនបានអនុវត្តតាមកិច្ចព្រមព្រៀងក្នុងការអនុញ្ញាតឱ្យនាំចូលគ្រឿងចក្រសម្រាប់សម្អាតគំនរបាក់បែកនោះទេ៕

Leave a Reply

Your email address will not be published. Required fields are marked *

Exit mobile version