អ៊ីរ៉ាក់-អារ៉ាប់រួម កំពុងរៀបចំសាងសង់ខ្សែកាបទិន្នន័យក្រោមសមុទ្រនិងលើដីតម្លៃប្រមាណ 700 លានដុល្លារ ដើម្បីតភ្ជាប់សហព័ន្ធ អារ៉ាប់រួមទៅកាន់ប្រទេសទួរគីតាមរយៈអ៊ីរ៉ាក់ ខណៈតំបន់ឈូងសមុទ្រកំពុងប្រកួតប្រជែងក្លាយជាមជ្ឈមណ្ឌលហេដ្ឋារចនាសម្ព័ន្ធបញ្ញាសិប្បនិម្មិត (AI) និងមជ្ឈមណ្ឌលទិន្នន័យ។
ប្រភពពីសារព័ត៌មានReuter នៅថ្ងៃទី១៧ខែកុម្ភៈ។
គម្រោងដែលមានម៉ាក “WorldLink” នឹងចាប់ផ្តើមដោយខ្សែកាបក្រោមសមុទ្រពី UAE ទៅឧបទ្វីប Faw របស់អ៊ីរ៉ាក់ បន្ទាប់មកបន្តតាមផ្លូវគោកទៅព្រំដែនតួកគី។ លោក Ali El Akabi ប្រធានក្រុមហ៊ុន Tech 964 របស់អ៊ីរ៉ាក់ ដែលជាសមាជិកមួយក្នុងសម្ព័ន្ធ បានឱ្យដឹងថាគម្រោងនេះនឹងទទួលមូលនិធិឯកជននិងអនុវត្តជាដំណាក់កាលក្នុងរយៈពេលប្រាំឆ្នាំ។
សូមបញ្ជាក់ថា៖ គោលបំណងគឺកាត់បន្ថយការកកស្ទះ និងពេលវេលាបញ្ជូនទិន្នន័យ។ គម្រោងនេះកើតឡើងត្រឹមតែជាងមួយសប្តាហ៍បន្ទាប់ពីអារ៉ាប៊ីសាអូឌីតនិងស៊ីរីប្រកាសគម្រោងខ្សែកាបអុបទិក “SilkLink” តម្លៃប្រមាណ 1 ពាន់លានដុល្លារ ដើម្បីស្តារហេដ្ឋារចនាសម្ព័ន្ធស៊ីរី និងដាក់ប្រទេសជាផ្លូវទិន្នន័យភ្ជាប់អាស៊ី-អឺរ៉ុប៕