ម្តេច ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រាប់សារព័ត៌មាន Reuters កាលពីថ្ងៃអង្គារថា កងកម្លាំងថៃកំពុងកាន់កាប់ទឹកដីកម្ពុជា។
ក្រោយការប្រយុទ្ធគ្នា នៅឆ្នាំមុន ទោះបីជាមានកិច្ចព្រមព្រៀងសន្តិភាព ដែលសម្របសម្រួល ដោយប្រធានាធិបតីអាមេរិក លោក ដូណាល់ ត្រាំ។
គួរំលឹកថា សម្តេច ហ៊ុន ម៉ាណែត បានធ្វើដំណើរទៅកាន់ទីក្រុងវ៉ាស៊ីនតោន ដើម្បីចូលរួមសម័យប្រជុំនៃ ក្រុមប្រឹក្សាសន្តិភាព(Board of Peace) របស់លោក ត្រាំ ក្នុងសប្តាហ៍នេះ។
សម្តេចសង្ឃឹមថា អង្គភាពថ្មីនេះ អាចដើរតួនាទីក្នុងការកាត់បន្ថយភាពតានតឹង នៅតាមព្រំដែន ដែលសម្ដេច បានពិពណ៌នាថា មានសភាព ផុយស្រួយ ទោះបីជាមានការឈប់បាញ់ កាលពីខែធ្នូ ក៏ដោយ។
ក្រុមប្រឹក្សានេះ ត្រូវបានបង្កើតឡើងដើម្បីត្រួតពិនិត្យផែនការសន្តិភាពនៅហ្គាហ្សា (Gaza)។
ប៉ុន្តែលោក ត្រាំ បានមានប្រសាសន៍ថា វាក៏អាចដើរតួនាទីកាន់តែទូលំទូលាយផងដែរ។
ការលើកឡើងរបស់ មេដឹកនាំកម្ពុជាលើវិវាទព្រំដែននេះ បានសង្កត់ធ្ងន់លើហានិភ័យដែលថា ជម្លោះអាចនឹងផ្ទុះឡើងម្តងទៀត បើទោះបីជាលោក ត្រាំ បន្តជំរុញពីជោគជ័យ នៃកិច្ចព្រមព្រៀងសន្តិភាពក៏ដោយ។
ការប្រយុទ្ធគ្នាដ៏អាក្រក់បំផុត បានផ្ទុះឡើងកាលពីខែកក្កដា ឆ្នាំ ២០២៥ បានធ្វើឱ្យមនុស្សរាប់សែននាក់ភៀសខ្លួន និងរំខានដល់ការធ្វើពាណិជ្ជកម្មតាមព្រំដែនដែលមានប្រវែង៨១៧ គីឡូម៉ែត្រ។
កិច្ចព្រមព្រៀងសន្តិភាព កាលពីខែតុលា ដែលត្រូវបានចុះហត្ថលេខា ជាមួយលោក ត្រាំ និងនាយករដ្ឋមន្ត្រីម៉ាឡេស៊ី បានរលាយ ក្នុងរយៈពេលប៉ុន្មានសប្តាហ៍ប៉ុណ្ណោះ មុនពេលការឈប់បាញ់ថ្មីមួយត្រូវបានសម្រេចនៅថ្ងៃទី ២៧ ខែធ្នូ។
សម្តេច ហ៊ុន ម៉ាណែត បានប្រាប់ Reuters ដូច្នេះថា នៅតែមានកងកម្លាំងថៃកាន់កាប់ជ្រៅក្នុងទឹកដីកម្ពុជា ក្នុងតំបន់ជាច្រើន។
នេះគឺលើសពីខ្សែបន្ទាត់ព្រំដែន ដែលថៃបានទាមទារ តែឯកតោភាគីទៅទៀត។
សម្តេច បន្ថែមថា ទាហានថៃបានដាក់ទូកុងតឺន័រ និងរបងលួសបន្លានៅក្នុងតំបន់ដែលថៃ ធ្លាប់បានទទួលស្គាល់ជាយូរមកហើយថាជាទឹកដីកម្ពុជា ហើយប្រជាពលរដ្ឋមិនអាចត្រឡប់ទៅផ្ទះវិញបានទេ។
សម្តេចសង្កត់ធ្ងន់ថា៖ នេះមិនមែនជាការចោទប្រកាន់ទេ ប៉ុន្តែវាជាសេចក្តីថ្លែងការណ៍អំពីការពិតនៅលើដីផ្ទាល់។
សម្តេចបន្តថា កម្ពុជាមិនអាចទទួលយកបាននូវអ្វីដែលលោកហៅថា ជា ការរំលោភលើអធិបតេយ្យភាព ឬបូរណភាពទឹកដីរបស់យើង នោះទេ។ សម្តេចសង្ឃឹមថា ប្រទេសថៃ នឹងយល់ព្រមឱ្យគណៈកម្មការ JBC ចាប់ផ្តើមការងារឱ្យបានឆាប់ តាមដែលអាចធ្វើទៅបាន៕