ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃសុក្រទី២៧.០៣.២០២៦ថា ទីក្រុងគៀវរំពឹងថា ប្រទេសនៅមជ្ឈិមបូព៌ា នឹងជួយផ្គត់ផ្គង់ប្រេងម៉ាស៊ូត ជាថ្នូរនឹងការជួយទប់ទល់នឹងមីស៊ីល Shahed របស់អ៊ីរ៉ង់។
សារព័ត៌មានAnadolu។
លោក Zelenskyy បានប្រាប់ប៉ុស្តិ៍ ICTV ដែលមានមូលដ្ឋាននៅអ៊ុយក្រែនថា ក្នុងអំឡុងពេលដំណើរទស្សនកិច្ចរបស់លោក ទៅកាន់មជ្ឈិមបូព៌ា លោកកំពុង “បិទបញ្ហា”នៃការផ្គត់ផ្គង់ប្រេងម៉ាស៊ូត ទៅកាន់ទីក្រុងគៀវ។
លោក Zelenskyy និយាយថា អ៊ុយក្រែន កំពុងផ្តល់ជំនាញដល់ប្រទេសនៅមជ្ឈិមបូព៌ា ដើម្បីការពារហេដ្ឋារចនាសម្ព័ន្ធស៊ីវិល និងជនស៊ីវិល ដោយគូសបញ្ជាក់ថា”បញ្ហាប្រឈមចម្បង” សម្រាប់តំបន់នេះ នៅតែជាការការពារប្រឆាំងនឹងយន្តហោះគ្មានមនុស្សបើករបស់អ៊ីរ៉ង់ ទោះបីជាមានប្រព័ន្ធការពារដែនអាកាស ដ៏សំខាន់របស់ពួកគេក៏ដោយ។
លោកនិយាយថា លោកបានរៀបចំ “កិច្ចប្រជុំសំខាន់ៗ”ចំនួនពីរក្នុងអំឡុងពេលដំណើរទស្សនកិច្ចរបស់លោកទៅកាន់មជ្ឈិមបូព៌ា ដោយនិយាយថាពួកគេ “វិជ្ជមាន”សម្រាប់អ៊ុយក្រែន ប៉ុន្តែមិនបានផ្តល់ព័ត៌មានលម្អិតទេ។
លោក Zelenskyy និយាយថា ប្រទេសរបស់លោក និងអារ៉ាប៊ីសាអូឌីត បានឈានដល់”ការរៀបចំដ៏សំខាន់” លើកិច្ចសហប្រតិបត្តិការការពារជាតិក្នុងអំឡុងពេលដំណើរទស្សនកិច្ច របស់លោកទៅកាន់ប្រទេសឈូងសមុទ្រ។
ទាក់ទងនឹងជំនួបរបស់លោកជាមួយព្រះអង្គម្ចាស់រាជទាយាទអារ៉ាប៊ីសាអូឌីត ម៉ូហាម៉េដ ប៊ីន សាលម៉ាន លោកបានមានប្រសាសន៍ថា ពួកគេបានពិភាក្សាអំពីស្ថានភាពនៅមជ្ឈិមបូព៌ា និងតំបន់ឈូងសមុទ្រ ក៏ដូចជាការវិវឌ្ឍនៃការផ្គត់ផ្គង់ប្រេងឥន្ធនៈ។
លោក ក៏បានជួបជាមួយក្រុមអ្នកជំនាញយោធាអ៊ុយក្រែន ដែលបានស្ថិតនៅក្នុងប្រទេសឈូងសមុទ្រនេះអស់រយៈពេលមួយសប្តាហ៍ចុងក្រោយនេះ ដើម្បីជួយទប់ទល់នឹងយន្តហោះគ្មានមនុស្សបើករបស់អ៊ីរ៉ង់៕