(បាត់ដំបង)៖ នៅព្រឹកថ្ងៃទី១២ ខែមិថុនា ឆ្នាំ២០២៦ សម្តេចតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រ និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ អញ្ជើញជួបសំណេះសំណាលជាមួយក្រុមប្រឹក្សាខេត្ត ក្រុង.ស្រុក.ឃុំ.សង្កាត់ និងថ្នាក់ដឹកនាំមន្ទីរ អង្គភាពនានា ជុំវិញខេត្តបាត់ដំបង និងខេត្តប៉ៃលិន។
ពិធីសំណេះសំណាលនេះ មានការអញ្ជើញចូលរួមពីសមាជិកព្រឹទ្ធសភា រដ្ឋសភា ប្រធាន អនុប្រធាន ក្រុមការងារថ្នាក់ជាតិចុះជួយខេត្ត សមាជិកក្រុម ប្រឹក្សាខេត្ត ក្រុង ស្រុក ឃុំ សង្កាត់ ព្រមទាំងថ្នាក់ដឹកនាំមន្ទីរ អង្គភាពនានាជុំវិញខេត្តទាំងពីរ។
សម្តេចតេជោ បានហៅការអញ្ជើញចុះជួបសំណេះសំណាលជាមួយ ក្រុមប្រឹក្សារាជធានី ខេត្ត ក្រុង.ស្រុក.ឃុំ សង្កាត់ និងថ្នាក់ដឹកនាំមន្ទីរ អង្គភាពនានានេះ ជាដំណើរឆ្ពោះទៅកាន់មូលដ្ឋាន។
ដំណើរឆ្ពោះទៅកាន់មូលដ្ឋាន បានចាប់ផ្តើមកាលពីថ្ងៃ ទី២៥ ខែមេសា ឆ្នាំ២០២៦។
រាជធានីខេត្តចំនួន១៧រួចមកហើយ ដែលសម្តេចតេជោ ហ៊ុន សែន បានអញ្ជើញជួបសំណេះសំណាល រួមមាន៖ ខេត្តកំពង់ចាម.ត្បូងឃ្មុំ កំពង់ស្ពឺ តាកែវ កំពត កែប.ស្វាយរៀង.ព្រៃវែង.រាជធានីភ្នំពេញ កំពង់ឆ្នាំង ពោធិ៍សាត់.កំពង់ធំ កណ្តាល.សៀមរាប ឧត្តរមានជ័យនិងបន្ទាយមានជ័យ។
ខេត្តបាត់ដំបង.ស្ថិតនៅភូមិភាគពាយព្យនៃប្រទេសកម្ពុជា មានផ្ទៃដីសរុប ១១ ៦៣១,២១គីឡូម៉ែត្រក្រឡា ចែកចេញជា១៤ក្រុង ស្រុក មាន១០៣ឃុំ សង្កាត់ ស្មើនឹង៨៤២ភូមិ។
ប្រជាជនសរុបមានចំនួន ៣០៤ ៣៥៤គ្រួសារ ស្មើនឹង១ ៣៤៤ ៣២៣នាក់ ក្នុងនោះស្ត្រីមានចំនួន ៦៨៣ ២៩២នាក់។
ពាក់ព័ន្ធសេដ្ឋកិច្ចវិញ នៅឆ្នាំ២០២៥ ខេត្តបាត់ដំបង មានទំហំសេដ្ឋកិច្ចប្រមាណ ១៤ ៥១៦៧៤៣,១លានរៀល ស្មើនឹង៣ ៦១៨,៣លានដុល្លារ។
ក្នុងនោះវិស័យកសិកម្មគ្របដណ្តប់ខ្ពស់ជាងគេ គឺមាន ៦២,៣២ភាគរយ វិស័យសេវាកម្ម មានទំហំ ២២,២៦ភាគរយ និងវិស័យ ឧស្សា ហកម្ម មានទំហំ១៥,៤២ភាគរយ។ ចំណូលជាមធ្យមសម្រាប់មនុស្សម្នាក់ៗក្នុងមួយឆ្នាំមាន ២ ៥៦៣ដុល្លារ។
ខេត្តបាត់ដំបង មានព្រំប្រទល់ខាងជើងជាប់ខេត្តបន្ទាយមានជ័យ ខាងត្បូងជាប់ខេត្តពោធិ៍សាត់ ខាងកើតជាប់ខេត្តសៀមរាប និងបឹងទន្លេសាប និងខាងលិចជាប់ខេត្តប៉ៃលិន និងប្រទេសថៃ ប្រវែង ១៤៤,៨គីឡូម៉ែត្រ (ជាប់ខេត្តត្រាត ខេត្តច័ន្ទបុរី និងខេត្តស្រះកែវ) មានបង្គោលសីមាចំនួន ១៣បង្គោល (បង្គោលលេខ៥២-៦២ និង៦៩, ៧០)។
ខេត្តបាត់ដំបង មានច្រកទ្វារព្រំដែនចំនួន៥ច្រក គឺច្រកទ្វារព្រំដែនអន្តរជាតិចំនួន២ និងមានច្រកទ្វារតំបន់ព្រំដែនចំនួន៣ច្រក។
ដោយឡែកខេត្តប៉ៃលិន ជាខេត្តមួយទើបទទួលបានសន្តិភាពពេញលេញក្រោយគេ នៅឆ្នាំ១៩៩៨ ស្ថិតនៅភាគពាយព្យនៃប្រទេសកម្ពុជា មានចម្ងាយ ៣៧៥គីឡូម៉ែត្រ ពីរាជធានីភ្នំពេញ មានព្រំ ប្រទល់ខាងកើត ខាងជើង និងខាងត្បូងជាប់នឹងខេត្តបាត់ដំបង និងខាងលិចជាប់នឹងប្រទេសថៃ
ដែលមានខ្សែបន្ទាត់ព្រំដែនប្រវែង ៥៣,២គីឡូម៉ែត្រ ចាប់ពីបង្គោលឡាក់លេខ៦២ ដល់លេខ៦៨។
ខេត្តប៉ៃលិន មានផ្ទៃដីសរុបចំនួន ១ ១៩៥,១៨គីឡូម៉ែត្រក្រឡា ចែកចេញជាក្រុង១ និងស្រុក១ មាន ៨ឃុំ-សង្កាត់ និង ៩៣ភូមិ។ មានផ្លូវជាតិសដ្ឋកិច្ចចំនួន ២ខ្សែ គឺផ្លូវជាតិលេខ៥៧ និងលេខ ៥៩ និងមានស្ទឹងចំនួន៣ គឺស្ទឹងភ្នំដំបង ស្ទឹងប៉ៃលិន និងស្ទឹងកុយ។
ប្រជាពលរដ្ឋសរុបចំនួន ២០ ០៣៧គ្រួសារ ស្មើនឹង៨៤ ៦២៣នាក់ ស្រី ៤២.៣១៥នាក់៕
