(កណ្តាល)៖ ទាំងអាជ្ញាធរភូមិ.ឃុំ.រួមនិងម្ចាស់អាជីវកម្មដឹកដី បានចេញមកបញ្ជាក់ថា ខ្លួនពុំបានគប់គិតគ្នា ប្រព្រឹត្តអំពើពុករលួយ ឬបំផ្លាញផ្លូវបេតុងត្រង់ចំណុចភូមិស្ទឹង ឃុំសំរោងធំ ស្រុកកៀនស្វាយ ខេត្តកណ្តាល នោះឡើយ!។
ផ្ទុយទៅវិញ អាជ្ញាធរឃុំ.ស្រុក បានណែនាំឲ្យម្ចាស់អាជីវកម្ម ត្រូវធ្វើការដឹកជញ្ជូនអាចម៍ដី ប្រកបដោយការទទួលខុសត្រូវខ្ពស់!។
*ការចេញបំភ្លឺពីសំណាក់ មន្ត្រីពាក់ព័ន្ធនៅពេលនេះ បន្ទាប់ពីសារព័ត៌មានមួយចំនួន បានចុះផ្សាយដែលមានខ្លឹមសារថា អាជ្ញាធរឃុំសំរោងធំ ត្រូវថ្នាំសណ្ដំរបស់ឈ្មួញ និងដុល្លារបាំងមុខ ទើបគប់គិតគ្នា អនុញ្ញាតឱ្យឈ្មួញដឹកដីបំផ្លាញផ្លូវបេតុងក្នុងភូមិស្ទឹង.!!។
*ទាក់ទិនករណីនេះលោក ចាន់ សុខ មេភូមិស្ទឹង
បានថ្លែងប្រាប់”ដើមរាំង”ថា ខ្លួនពុំបានគប់គិតគ្នានោះទេ ហើយលោកសុំបដិសេធចោល រាល់ការចោទប្រកាន់ដោយគ្មានមូលដ្ឋាន.!។
លោក ចាន់ សុខ បន្តថា ផ្លូវបេតុងនេះ ជាផ្លូវចាស់ប្រវែង៦០០ម៉ែត្រ
ដែលបានកសាងតាំងពីឆ្នាំ២០០៩មកម្ល៉េះ និងឧសាលិចទឹក ហេតុនេះតែងតែមានការប្រេះស្រាំតិចតួចជារឿងជៀសមិនផុត! ពុំមែនជាកំហុសអាជ្ញាធរ និងការធ្វើអាជីវកម្មឡើយ។
*ជាមួយគ្នានេះលោក ជ័យ សំអាន មេឃុំសំរោងធំ បានអះអាងប្រាប់”ដើមរាំង”ថា ផ្លូវបេតុងខាងលើ មានស្នាមខូចត្រង់ចំណុចដែលខាងអាជីវកម្មទឹកស្អាត កាប់ទទឹងផ្លូវ ដើម្បីបង្កប់និងរាយទុយោមេ!។
បើតាមលោកមេឃុំ កន្លែងបង្កប់ទុយោនេះ បើមានប្រេះស្រាំថែមទៀត លោក សេង ឃៀង ម្ចាស់អាជីវកម្មដឹកដី ធានាជួសជុលឡើងវិញ។
លោកមេឃុំ បញ្ជាក់ថា ផ្លូវ១កំណាត់ទៀត ដែលបែកផុកនិងខូចនោះ ជាផ្លូវលំសម្រាប់អ្នកភូមិ.ធ្វើដំណើរទៅបឹង ហើយកន្លងមក សហគមន៍ភូមិ.បានចាក់ថ្មមិច ដើម្បីប្រើប្រាស់ជាបណ្ដោះអាសន្ន។
និយាយជារួម ផ្លូវនៅតំបន់ខាងលើ ១កំណាត់ជាផ្លូវបេតុងចាស់ ១កំណាត់ជាផ្លូវលំទៅបឹង ខណៈការធ្វើអាជីវកម្មដឹកដី ពុំបានបំផ្លាញផ្លូវបេតុងនោះឡើយ។
*ចំណែកលោក សេង ឃៀង ម្ចាស់អាជីវកម្មដឹកដី
បានថ្លែងប្រាប់”ដើមរាំង”ថា ខ្លួនមានច្បាប់អនុញ្ញាតត្រឹមត្រូវ ក្នុងការធ្វើអាជីវកម្ម!។
ក្នុងនោះ លោកធ្វើការដឹកជញ្ជូនអាចម៍ដី ដោយគោរពតាមបទដ្ឋានបច្ចេកទេស និងការណែនាំរបស់អាជ្ញាធរ។
លោកបន្តថា នៅរដូវវស្សាខែភ្លៀងជៀសមិនផុតទេ រឿងបែកផុកខ្លះៗព្រោះជាផ្លូវលំ។
ចំណែកផ្លូវបេតុង គឺពុំមានបែកផុកធំដុំឬខូចខាតធ្ងន់ធ្ងរនោះទេ ជាក់ស្តែងមានតែកម្អែលដីសើមបន្តិចបន្តួច លើផ្លូវបេតុងប៉ុណ្ណោះ!។
ទោះជាយ៉ាងណាក៏ដោយ.លោក សេង ឃៀង ធានាជួសជុលឡើងវិញ ទាំងកំណាត់ផ្លូវបេតុង និងកំណាត់ផ្លូវលំត្រង់ចំណុចខាងលើ ប្រសិនបើខូចខាត ខុសទ្រង់ទ្រាយដើម ខណៈពេលលោកកំពុងធ្វើអាជីវកម្មដឹកដី៕
