ការវាយប្រហារតាមអាកាសរបស់អ៊ីស្រាអែលនៅតំបន់ហ្គាហ្សា បានសម្លាប់ជនជាតិប៉ាឡេស្ទីនយ៉ាងហោចណាស់១០នាក់ និងធ្វើឱ្យមនុស្ស១៥នាក់ផ្សេងទៀតរងរបួស។
ប្រភពពីសារព័ត៌មានAl Jazeera នៅថ្ងៃទី២០ខែសីហា។
ការវាយប្រហារសំខាន់មួយបានកើតឡើងនៅទីស្នាក់ការប៉ូលិសក្រុងហ្គាហ្សា ខណៈតំបន់ជុំវិញមានប្រជាពលរដ្ឋជាច្រើនកំពុងស្នាក់នៅ។ មន្ទីរពេទ្យ al-Shifa បានទទួលសាកសពជនរងគ្រោះ ៩នាក់ពីការវាយប្រហារនេះ។ ក្នុងចំណោមអ្នកស្លាប់ មានមេប៉ូលិសក្រុងដែលទើបត្រូវបានតែងតាំង មន្ត្រីដឹកនាំកងប៉ូលិសស្ត្រី និងមន្ត្រីប៉ូលិសមួយចំនួន។
ការវាយប្រហារមួយផ្សេងទៀតនៅជំរំជនភៀសខ្លួន Nuseirat ភាគកណ្តាលហ្គាហ្សា បានសម្លាប់មនុស្សម្នាក់បន្ថែមទៀត។
កងទ័ពអ៊ីស្រាអែលបានអះអាងថា ការវាយប្រហារនៅ Nuseirat មានគោលដៅលើមេបញ្ជាការក្រុមហាម៉ាស់ពីរនាក់ ហើយការវាយប្រហារបន្ទាប់នៅតំបន់ Tuffah ក្នុងទីក្រុងហ្គាហ្សា មានគោលដៅលើមេបញ្ជាការហាម៉ាស់ម្នាក់ទៀត។
ជាមួយគ្នានេះ ហាម៉ាស់បានបដិសេធការអះអាងរបស់អ៊ីស្រាអែល ដោយចាត់ទុកការវាយប្រហារនេះថា ជា “ឧក្រិដ្ឋកម្មសង្គ្រាមថ្មី” និងនិយាយថា ការអះអាងអំពីការកំណត់គោលដៅលើមេដឹកនាំក្រុមប្រយុទ្ធ គឺជាហេតុផលដែលគ្មានមូលដ្ឋាន ដើម្បីបិទបាំងការវាយប្រហារលើជនស៊ីវិល និងប៉ូលិសដែលមិនមានអាវុធ៕
