ប៉ូលិសក្នុងតំបន់ និងក្រសួងការបរទេសបង់ក្លាដែសបានឱ្យដឹងថាមនុស្សយ៉ាងហោច៩នាក់ ក្នុងនោះរួមមានជនជាតិបង់ក្លាដែស ៥នាក់ បានស្លាប់បាត់បង់ជីវិតនៅក្នុងហេតុការណ៍គ្រោះអគ្គិភ័យឆាបឆេះសណ្ឋាគារមួយកន្លែង ស្ថិតនៅឯទីក្រុង Kolkata ភាគខាងកើតប្រទេសឥណ្ឌា កាលពីថ្ងៃពុធទី១៩ ខែសីហា។
ប្រភពពីសារព័ត៌មាន Reuters។
មន្ត្រីប៉ូលិសជាន់ខ្ពស់ម្នាក់បានប្រាប់ Reuters ថា អគ្គិភ័យបានឆាបឆេះឡើងនៅវេលាម៉ោងប្រមាណ ២៖៥០ នាទីទៀបភ្លឺ នៅជាន់ទីពីរនៃអគារសណ្ឋាគារ ហើយត្រូវបានគ្រប់គ្រងបានទាំងស្រុងក្នុងរយៈពេលប្រហែលមួយម៉ោងក្រោយមក។ មន្ត្រីរូបនេះបានបន្ថែមថាក្នុងចំណោមអ្នកស្លាប់ ក៏មានកុមារម្នាក់ផងដែរ ខណៈមូលហេតុនៃការឆាបឆេះអាចបណ្តាលមកពីការឆ្លងចរន្តអគ្គិសនី។
បើតាមរដ្ឋមន្ត្រីទទួលបន្ទុកសេវាពន្លត់អគ្គិភ័យនៃរដ្ឋ Bengal ខាងលិច លោក Koushik Chowdhury មនុស្សប្រមាណ ៨០នាក់ត្រូវបានជួយសង្គ្រោះចេញពីកន្លែងកើតហេតុដោយសុវត្ថិភាព៕
