កងទ័ពអេត្យូពីបានចោទប្រកាន់ប្រទេសស៊ូដង់ និងអេហ្ស៊ីបថា កំពុងគាំទ្រក្រុមប្រយុទ្ធ TPLF ដែលកំពុងប្រយុទ្ធជាមួយរដ្ឋាភិបាលអេត្យូពីនៅតំបន់ភាគខាងជើងទីហ្គ្រាយ។
ប្រភពពីសារព័ត៌មានAl Jazeera នៅថ្ងៃទី២៨ខែកញ្ញា។
មេបញ្ជាការកងទ័ពអេត្យូពី លោក Birhanu Jula បាននិយាយថា ក្រុមប្រយុទ្ធទាំងនេះមិនអាចបន្តប្រយុទ្ធបានទេ ប្រសិនបើគ្មានការផ្គត់ផ្គង់ និងការគាំទ្រពីស៊ូដង់ អេហ្ស៊ីប និងប្រទេសខាងក្រៅផ្សេងទៀត។
ជាការឆ្លើយតប កងទ័ពស៊ូដង់បានបដិសេធការចោទប្រកាន់នេះ ដោយហៅថា «គ្មានមូលដ្ឋាន»។ ស៊ូដង់វិញបានចោទប្រកាន់ថា ក្រុម RSF ដែលកំពុងប្រយុទ្ធជាមួយកងទ័ពស៊ូដង់ កំពុងទទួលការគាំទ្រពីក្នុងទឹកដីអេត្យូពី រួមទាំងការហ្វឹកហាត់ ការផ្គត់ផ្គង់ និងសកម្មភាពយោធាដោយប្រើដ្រូន។
ការប្រយុទ្ធរវាង TPLF និងរដ្ឋាភិបាលអេត្យូពីបានផ្ទុះឡើងវិញនៅថ្ងៃទី២៣ ខែកញ្ញា បង្កការព្រួយបារម្ភថា សង្គ្រាមនៅទីហ្គ្រាយឆ្នាំ២០២០–២០២២ អាចកើតឡើងវិញ។ សង្គ្រាមលើកមុនត្រូវបានគេប៉ាន់ប្រមាណថា បណ្តាលឱ្យមនុស្សប្រហែល ៦០០,០០០នាក់ស្លាប់។
កាលពីថ្ងៃអាទិត្យ ទីស្នាក់ការរបស់ស្ថានីយទូរទស្សន៍ Tigrai TV នៅទីក្រុង Mekelle ក៏ត្រូវបានវាយប្រហារដោយដ្រូន ខណៈតំបន់ទីហ្គ្រាយកំពុងជួបការរំខានផ្នែកទំនាក់ទំនង៕
