សម្ព័ន្ធដឹកនាំដោយអារ៉ាប៊ីសាអូឌីត ដែលកំពុងប្រយុទ្ធប្រឆាំងក្រុមហ៊ូទី នៅយេម៉ែន បាននិយាយថា កងកម្លាំងរបស់ខ្លួន បានស្ទាក់និងបំផ្លាញមីស៊ីលបាលីស្ទិក២គ្រឿងនិងដ្រូន ៤គ្រឿង ដែលក្រុមហ៊ូទីបាញ់ ចេញពីយេម៉ែន។
ប្រភពពីសារព័ត៌មានTRT World នៅថ្ងៃទី២ខែតុលា។
សម្ព័ន្ធនេះបានឱ្យដឹងថា មីស៊ីល និងដ្រូនត្រូវបានស្ទាក់នៅលើមេឃជុំវិញទីក្រុង Jazan ភាគខាងត្បូងអារ៉ាប៊ីសាអូឌីត និងទីក្រុង Khamis Mushait ភាគនិរតី។ តំបន់ទាំងនេះមានទីតាំងថាមពល ប្រេង និងមូលដ្ឋានទ័ពអាកាស ដែលធ្លាប់រងការវាយប្រហារនាពេលថ្មីៗនេះ។
ជាមួយគ្នានេះ អង្គភាពប្រតិបត្តិការពាណិជ្ជកម្មដែនសមុទ្ររបស់ចក្រភពអង់គ្លេស (UKMTO) បានរាយការណ៍ថា នាវាដឹកប្រេងមួយគ្រឿងត្រូវបានវត្ថុមិនស្គាល់អត្តសញ្ញាណវាយប្រហារ ខណៈកំពុងធ្វើដំណើរឆ្លងកាត់ច្រកសមុទ្រ Hormuz បណ្តាលឱ្យមានភ្លើងឆេះ។
UKMTO បញ្ជាក់ថា សមាជិកនាវិកទាំងអស់មានសុវត្ថិភាព ប៉ុន្តែមិនទាន់ដឹងច្បាស់ពីទំហំនៃការខូចខាត និងផលប៉ះពាល់ដល់បរិស្ថាននៅឡើយ៕
