សម្ព័ន្ធដឹកនាំដោយអារ៉ាប៊ីសាអូឌីត ដែលប្រយុទ្ធប្រឆាំងក្រុមហ៊ូទី នៅយេម៉ែន បានចោទប្រកាន់ថា ក្រុមហ៊ូទី បានវាយប្រហារស្ថានីយចែកចាយអគ្គិសនីមួយនៅទីក្រុងម៉ាឌីណា ប្រទេសអារ៉ាប៊ីសាអូឌីត កាលពីថ្ងៃអង្គារទី២៩.០៩.២០២៦។
ការវាយប្រហារបានធ្វើឱ្យម៉ាស៊ីនបម្លែងអគ្គិសនីមួយខូច ប៉ុន្តែមិនប៉ះពាល់ដល់បណ្តាញអគ្គិសនីទាំងមូលទេ។
សម្ព័ន្ធអារ៉ាប៊ីសាអូឌីតនិយាយថា ការពិនិត្យសំណល់ដ្រូនបានបញ្ជាក់ថា ហ៊ូទីជាអ្នករៀបចំ និងអនុវត្តការវាយប្រហារ។ ប៉ុន្តែ ក្រុមហ៊ូទីបានបដិសេធ ដោយហៅការចោទប្រកាន់នេះថាជា “ការកុហក”។
នៅថ្ងៃព្រហស្បតិ៍ សម្ព័ន្ធនេះក៏បាននិយាយថា ខ្លួនបានបាញ់ទម្លាក់ដ្រូន ៤គ្រឿង និងមីស៊ីលបាលីស្ទិក ២គ្រឿង ដែលត្រូវបានបាញ់ឆ្ពោះទៅតំបន់ភាគខាងត្បូងប្រទេសអារ៉ាប៊ីសាអូឌីត។
ជាមួយគ្នានេះ នៅខេត្តតាអ៊ីស ប្រទេសយេម៉ែន កងកម្លាំងរដ្ឋាភិបាលដែលមានអារ៉ាប៊ីសាអូឌីតគាំទ្រ បាននិយាយថា ពួកគេបានវាយបកការវាយប្រហារទ្រង់ទ្រាយធំរបស់ហ៊ូទី និងបានសម្លាប់អ្នកប្រយុទ្ធហ៊ូទីយ៉ាងហោចណាស់ ៣០នាក់ នៅតំបន់មួយ ខណៈមនុស្សជាច្រើននាក់ទៀតរងរបួស។
ការប្រយុទ្ធនៅតំបន់តាអ៊ីសកាន់តែខ្លាំងឡើង ខណៈចំនួនប្រជាជនយេម៉ែនដែលត្រូវផ្លាស់ទីលំនៅក្នុងប្រទេសក៏កើនឡើង។ តាមទិន្នន័យរដ្ឋាភិបាល មនុស្សប្រហែល ១៩៧,៩០៦នាក់ ត្រូវបានចុះឈ្មោះជាអ្នកផ្លាស់ទីលំនៅ ហើយជាង ៩៧,០០០នាក់ កំពុងស្នាក់នៅក្នុងខេត្តតាអ៊ីស៕
