ក្រុមសិទ្ធិមនុស្ស Emergency Lawyers បានឱ្យដឹងថា កងកម្លាំងប្រដាប់អាវុធ RSF បានសម្លាប់មនុស្ស ៤ នាក់ ដែលជាសមាជិកគ្រួសារតែមួយ នៅតំបន់ Al-Mazroub ក្នុងរដ្ឋ North Kordofan ប្រទេសស៊ូដង់។
ប្រភពពីសារព័ត៌មានAA news នៅថ្ងៃទី១០ខែតុលា។
តាមប្រភពដដែល កងកម្លាំង RSF បានទៅផ្ទះគ្រួសារនេះកាលពីថ្ងៃចន្ទ ដើម្បីប្លន់ទ្រព្យសម្បត្តិ ប៉ុន្តែសមាជិកគ្រួសារបានរារាំងពួកគេ។ នៅថ្ងៃបន្ទាប់ កងកម្លាំងនេះបានត្រឡប់មកវិញ និងសម្លាប់មនុស្ស ៤ នាក់ក្នុងគ្រួសារនោះ។
ក្រុមសិទ្ធិមនុស្សបានថ្កោលទោសអំពើសម្លាប់នេះ និងអំពាវនាវឱ្យមានការស៊ើបអង្កេតឱ្យបានច្បាស់លាស់ ព្រមទាំងចាត់ទោសអ្នកដែលពាក់ព័ន្ធ និងការពារជីវិតប្រជាជនស៊ីវិល។ រហូតមកដល់ពេលនេះ កងកម្លាំង RSF មិនទាន់បានឆ្លើយតបចំពោះការចោទប្រកាន់នេះទេ។
ស៊ូដង់កំពុងប្រឈមនឹងសង្គ្រាមរវាងកងទ័ពជាតិ និងកងកម្លាំង RSF ចាប់តាំងពីឆ្នាំ២០២៣ ដោយសារជម្លោះអំពីការបញ្ចូលកងកម្លាំង RSF ទៅក្នុងកងទ័ពជាតិ។ សង្គ្រាមនេះបានបណ្តាលឱ្យមនុស្សរាប់ម៉ឺននាក់ស្លាប់ និងប្រជាជនប្រមាណ ១៣ លាននាក់ត្រូវចាកចេញពីផ្ទះសម្បែង ដើម្បីគេចពីការប្រយុទ្ធគ្នា៕
