ប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃចន្ទថា ក្រសួងយុត្តិធម៌អាមេរិកកំពុងពិនិត្យករណីរបស់លោកស្រី អ៊ីលហាន អូម៉ា ដែលជាសមាជិកសភាមកពីគណបក្សប្រជាធិបតេយ្យយ៉ាងយកចិត្តទុកដាក់។ ទោះជាយ៉ាងណា លោក ត្រាំ បានបដិសេធថា លោកមិនមានជាប់ពាក់ព័ន្ធនឹងការស៊ើបអង្កេតនេះទេ។
ប្រភពពីសារព័ត៌មានAA news នៅថ្ងៃទី១៣ខែតុលា។
ការលើកឡើងនេះធ្វើឡើង បន្ទាប់ពីភ្នាក់ងារសហព័ន្ធអាមេរិកបានឆែកឆេរផ្ទះរបស់លោកស្រី អូម៉ា នៅទីក្រុងវ៉ាស៊ីនតោន កាលពីម៉ោង ៦ ព្រឹកថ្ងៃចន្ទ តាមដីកាដែលចេញដោយតុលាការ។ ក្រសួងយុត្តិធម៌បានបញ្ជាក់ថា ប្រតិបត្តិការនេះជាផ្នែកមួយនៃការស៊ើបអង្កេតបទល្មើសព្រហ្មទណ្ឌរបស់សហព័ន្ធដែលកំពុងបន្ត ប៉ុន្តែមិនបានបញ្ជាក់លម្អិតអំពីករណីនេះទេ។
លោក ត្រាំ បានរិះគន់លោកស្រី អូម៉ា ប៉ុន្តែបាននិយាយថា ការសម្រេចចិត្តលើការស៊ើបអង្កេតជាការទទួលខុសត្រូវរបស់ក្រសួងយុត្តិធម៌។
ជាការឆ្លើយតប លោកស្រី អូម៉ា បានចោទប្រកាន់រដ្ឋបាលលោក ត្រាំ ថាកំពុងប្រើប្រាស់អំណាចអនុវត្តច្បាប់ដើម្បីដាក់សម្ពាធលើអ្នកនយោបាយដែលមានទស្សនៈផ្ទុយពីខ្លួន។ លោកស្រីបានបញ្ជាក់ថា លោកស្រីនឹងមិនចុះចាញ់ចំពោះការគំរាមកំហែងឡើយ។
សូមបញ្ជាក់ថា៖ លោកស្រី អូម៉ា ជាសមាជិកសភាអាមេរិកដើមកំណើតសូម៉ាលីដំបូងគេ។ លោកស្រីបានមកដល់សហរដ្ឋអាមេរិកក្នុងឆ្នាំ១៩៩៥ នៅពេលមានអាយុ ១២ ឆ្នាំ បន្ទាប់ពីគ្រួសារទទួលបានសិទ្ធិជ្រកកោន៕
