កាលពីថ្ងៃទី៨ ខែវិច្ឆិកា ឆ្នាំ២០២៦ រដ្ឋមន្ត្រីការបរទេសអ៊ីរ៉ាក់ លោក ហ្វួអាដ ហ៊ូសេន បានឱ្យដឹងថា អ៊ីរ៉ាក់បានឈានដល់ការយោគយល់ជាមួយសហរដ្ឋអាមេរិក ដើម្បីអនុញ្ញាតឱ្យនាវាដឹកប្រេងរបស់អ៊ីរ៉ាក់អាចឆ្លងកាត់ច្រកសមុទ្រហ័រមូស តាមផ្លូវនាវាចរណ៍មួយនៅក្បែរប្រទេសអូម៉ង់។
សារព័ត៌មានReuter។
លោកបានបញ្ជាក់ថា សង្គ្រាមជាមួយអ៊ីរ៉ង់ និងការរំខានដល់ការនាំចេញប្រេង បានធ្វើឱ្យអ៊ីរ៉ាក់ខាតបង់ថវិកាប្រមាណ ៦០ពាន់លានដុល្លារ។
ទោះជាយ៉ាងណា ការនាំចេញប្រេងរបស់អ៊ីរ៉ាក់បានចាប់ផ្តើមកើនឡើងវិញក្នុងខែតុលា ដោយកើនដល់ប្រមាណ ៣,៥លានបារ៉ែលក្នុងមួយថ្ងៃ បើធៀបនឹង ២,៦៥លានបារ៉ែលក្នុងមួយថ្ងៃ កាលពីខែកញ្ញា។
ការយោគយល់នេះត្រូវបានគេរំពឹងថា នឹងជួយឱ្យអ៊ីរ៉ាក់បន្តការនាំចេញប្រេង និងកាត់បន្ថយផលប៉ះពាល់សេដ្ឋកិច្ចពីជម្លោះនៅតំបន់មជ្ឈិមបូព៌ា៕
