(កំពង់ស្ពឺ)៖ នារសៀលថ្ងៃទី៩ ខែវិច្ឆិកា ឆ្នាំ២០២៦សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអញ្ជើញបើកវគ្គហ្វឹកហ្វឺនយោធិនកាតព្វកិច្ចជំនាន់ទី១ ឆ្នាំ២០២៦ ដែលរៀបចំនៅបញ្ជាការដ្ឋានការពារកោះឆ្នេរ ក្នុងខេត្តកំពង់ស្ពឺ។
កិច្ចពង្រឹងសមត្ថភាពការពារបូរណភាពទឹកដី និងអធិបតេយ្យជាតិនេះ ក៏មានការអញ្ជើញចូលរួមពីសមាជិក សមាជិកា ព្រឹទ្ធសភា រដ្ឋសភា និងរាជរដ្ឋាភិបាល ថ្នាក់ដឹកនាំក្រសួងការពារជាតិ នាយទាហាន នាយទាហានរង ពលទាហាន ព្រមទាំងយុវជនដែលបានដាក់ពាក្យ និងត្រូវបានជ្រើសរើសបំពេញយោធិនកាតព្វកិច្ចជាច្រើនរូបផ្សេងទៀត។
យោធិនកាតព្វកិច្ច ជាការអនុវត្តន៍ផែនការពង្រឹងកិច្ចការពារបូរណភាពទឹកដី និងអធិបតេយ្យជាតិ ដ៏មានសារៈសំខាន់មួយ ដែលត្រូវបានគិតគូរចាត់ចែងឱ្យអនុវត្តន៍ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជានីតិកាលទី៧នេះ ខណៈច្បាប់នេះមានតាំងពីឆ្នាំ២០០៦មកម្ល៉េះ។
សម្តេចធិបតី ហ៊ុន ម៉ាណែត បានប្រកាសយ៉ាងមហោឡារិកបង្ហាញការគិតគូរនៃការអនុវត្តន៍ច្បាប់កាតព្វកិច្ចយោធានៅក្នុងពិធីអបអរខួបអនុស្សាវរីយ៍លើកទី៣២ ទិវាកងរាជអាវុធហត្ថ នៅថ្ងៃទី១៤ ខែកក្កដា ឆ្នាំ២០២៥ នៅក្នុងខេត្តកំពង់ឆ្នាំង។
បន្ទាប់ពីការប្រកាសនោះ ដំណើរការនីតិវិធីបានចាប់ផ្តើមជាបន្តបន្ទាប់។ ក្រោមគំនិតផ្តួចផ្តើមដ៏ខ្ពង់ខ្ពស់របស់សម្តេចមហាធិបតីនាយករដ្ឋមន្ត្រី ក្រសួងការពារជាតិបានបង្កើតក្រុមការងារចំពោះកិច្ចសិក្សាស្រាវជ្រាវរៀបចំច្បាប់ស្តីពីកាតព្វកិច្ចយោធាឡើងវិញ ដើម្បីជាមូលដ្ឋានគ្រឹះនៃប្រភពកសាងកម្លាំងសម្រាប់វិស័យការពារជាតិ និងការអភិវឌ្ឍកាយសម្បទា ព្រមទាំងការបណ្តុះស្មារតីស្នេហាជាតិ ការអប់រំផ្នត់គំនិត និងវិន័យដែលជាតម្រូវការរបស់សង្គមជាតិ។
នៅថ្ងៃទី២៣ ខែឧសភា ឆ្នាំ២០២៦ ព្រះរាជក្រមលេខ នស/រកម/០៥២៦/០០៨ ប្រកាសឱ្យប្រើ ច្បាប់ស្តីពីកាតព្វកិច្ចយោធា, នៅថ្ងៃទី១២ ខែសីហា ឆ្នាំ២០២៦ រាជរដ្ឋាភិបាលបានចេញ អនុក្រឹត្យលេខ ១៧៦អនក្រ.បក ស្ដីពីការអនុវត្តច្បាប់ស្តីពីកាតព្វកិច្ចយោធា, នៅថ្ងៃទី២៤ ខែសីហា ឆ្នាំ២០២៦ រាជរដ្ឋាភិបាល បានចេញសេចក្តីសម្រេចលេខ ១០៤សសរ ស្តីពីការតែងតាំងសមាសភាពគណៈកម្មាធិការជាតិកាតព្វកិច្ចយោធា និងនៅថ្ងៃទី២៧ ខែតុលា ឆ្នាំ២០២៦ រាជរដ្ឋាភិបាល បានចេញអនុក្រឹត្យលេខ ២៣០ អនក្រ.បក ស្តីពីការជ្រើសរើសប្រជាពលរដ្ឋខ្មែរដើម្បីចូលបំពេញកាតព្វកិច្ចយោធាសម្រាប់ឆ្នាំ២០២៦ ចំនួន ១០,០០០នាក់។
បន្ទាប់ពីអនុម័តច្បាប់ថ្មី និងលិខិតបទដ្ឋានគតិយុត្តពាក់ព័ន្ធ រាជរដ្ឋាភិបាលបានរៀបចំគណៈកម្មាធិការជាតិកាតព្វកិច្ចយោធា ដើម្បីដឹកនាំរៀបចំការងារពាក់ព័ន្ធការទទួលយកប្រជាពលរដ្ឋ ចូលបំពេញកាតព្វកិច្ចយោធា ចាប់ពីឆ្នាំ២០២៦នេះតទៅ ក្នុងរយៈពេលជិត៣ខែ ចាប់ពីថ្ងៃទី១២ ខែសីហា ឆ្នាំ២០២៦ រហូតមកដល់ថ្ងៃទី៩ ខែវិច្ឆិកា ឆ្នាំ២០២៦ ការងារពាក់ព័ន្ធការអនុវត្តន៍ច្បាប់កាតព្វកិច្ចយោធាបានចាប់ផ្តើមជាបន្តបន្ទាប់។
ពាក់ព័ន្ធការងារហ្វឹកហ្វឺនយោធិនកាតព្វកិច្ច អនុគណៈកម្មាធិការទំនើបកម្មហ្វឹកហ្វឺនយោធា បានចុះពិនិត្យសាលាទាំង៨ ដែលត្រៀមទទួលយុវជនចូលបំពេញកាតព្វកិច្ចយោធា និងបានជួសជុលបំពេញបន្ថែមហេដ្ឋារចនាសម្ព័ន្ធ ជាអាទិ៍ ទីចាត់ការសាលា ការិយាល័យធ្វើការ ថ្នាក់រៀន អគារស្នាក់នៅ គ្រែ កៅអីសិក្សា ទីលានហ្វឹកហ្វឺន ទីលានបាញ់គ្រាប់ពិត ផ្ទះបាយ រោងហូបបាយ តុកៅអីហូបបាយ បន្ទប់ទឹក អាងទឹក បង្គន់អនាម័យ គិលានដ្ឋាន បណ្តាញទឹកប្រើប្រាស់ បណ្តាញអគ្គិសនី ព្រមទាំងការត្រៀមសព្វាវុធសម្រាប់ហ្វឹកហ្វឺន បាញ់គ្រាប់ពិត និងសម្ភារៈបច្ចេកទេសនានាដល់យោធិនកាតព្វកិច្ច ដោយសហការជាមួយស្ថាប័នចំណុះក្រសួងការពារជាតិ ដូចជាអគ្គនាយកដ្ឋានភស្តុភារ ហិរញ្ញវត្ថុ, អគ្គនាយកដ្ឋានសម្ភារៈបច្ចេកទេស, អគ្គនាយកដ្ឋានយោធសេវា, នាយកដ្ឋានវិស្វកម្ម និងនាយកដ្ឋានបុគ្គលិក។
ដំណើរការផ្តល់ និងទទួលពាក្យបំពេញកាតព្វកិច្ចយោធា ត្រូវបានចាប់ផ្តើមនៅខែតុលា ឆ្នាំ២០២៦។ ចាប់ពីថ្ងៃទី១ ដល់ថ្ងៃទី៩ ខែតុលា ប្រជាពលរដ្ឋខ្មែរ បានទទួលពាក្យសុំចូលបំពេញកាតព្វកិច្ចយោធាចំនួន ១៦,៣៧៦នាក់ នារីចំនួន២,៨៨៦នាក់។ ការទទួលពាក្យសុំចូលបំពេញកាតព្វកិច្ចយោធា ត្រូវបានចាប់ផ្តើមពីថ្ងៃទី១០ ដល់ថ្ងៃទី១៧ ខែតុលា។
ប្រជាពលរដ្ឋបានដាក់ពាក្យបំពេញកាតព្វកិច្ចមានចំនួនសរុប ១៤,៦៤៦នាក់ នារី ២,៤១៧នាក់៕
