(កណ្តាល)៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា មានក្តីរន្ធត់ និងសម្តែងការសោកស្តាយយ៉ាងក្រៃលែង ក្រោយពីបានទទួលដំណឹងដ៏សែនក្រៀមក្រំ អំពីមរណភាពរបស់សិស្សានុសិស្សនៃសាលា ប៊ែលធីអន្ដរជាតិ ចំនួន៥រូប ដោយសារឧបទ្ទវហេតុគ្រោះថ្នាក់ចរាចរណ៍ (រថយន្តធ្លាក់ចូលស្រះទឹក)។
បន្ទាប់ពីទទួលបានដំណឹងដ៏ក្រៀមក្រំនេះ នៅល្ងាចថ្ងៃទី១០ ខែវិច្ឆិកា ឆ្នាំ២០២៦ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានចាត់ ឯកឧត្តម កៀង វឌ្ឍនៈ ជំនួយការអគ្គលេខាធិការដ្ឋាន កាកបាទក្រហមកម្ពុជា រួមជាមួយថ្នាក់ដឹកនាំ មន្ត្រីសាខាកាកបាទក្រហមកម្ពុជា ខេត្តកណ្តាល អនុសាខាកាកបាទក្រហមកម្ពុជា ស្រុកពារាំង អញ្ជើញនាំយកសម្ភារៈនិងថវិកាមួយចំនួន ចូលរួមរំលែកទុក្ខយ៉ាងក្រំបំផុតជាមួយក្រុមគ្រួសារ នៃសពសិស្សទាំង៥រូបនៅគេហដ្ឋាននៃសព ស្ថិតនៅឃុំកំពង់ពពិល ស្រុកពារាំង ខេត្តព្រៃវែង។
សូមជម្រាបថា គ្រោះថ្នាក់ចរាចរណ៍នេះ បានកើតឡើង នៅតាមបណ្ដោយផ្លូវជាតិលេខ៨ ក្នុងភូមិអន្លង់ ឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល កាលពីព្រឹកថ្ងៃទី១០.១១.២០២៦។
ដោយរថយន្ដដឹកសិស្សសាលាប៊ែលធី គេចម៉ូតូរេចង្កូតធ្លាក់ផ្លូវ ចូលក្នុងទឹកស្រះ ស្លាប់៥នាក់(ស្រី៥នាក់) និងរបួសធ្ងន់ស្រាលចំនួន២១នាក់ ខណៈតៃកុងរថយន្ត ត្រូវសមត្ថកិច្ចឃាត់ខ្លួន។
*សេចក្តីរាយការណ៍បានឱ្យ”ដើមរាំង”ដឹងថា នៅមុនពេលកើតហេតុ មានរថយន្តក្រុងពណ៌សរ.ដឹកសិស្សទិសដៅពីកើតមកលិច ចេញពីស្រុកពារាំង ឆ្ពោះមកកាន់សាលាប៊ែលធី ខ្សាច់កណ្តាល.!។
លុះមកដល់កន្លែងកើតហេតុ ក៏មានម៉ូតូ១គ្រឿង មិនស្គាល់ម៉ាក បើកទិសដៅពីលិចមកកើត បញ្ច្រាសផ្លូវចូលមកខាងស្ដាំដៃរបស់រថយន្ត.!។
ភ្លាមនោះរថយន្តដឹកសិស្ស បានគេចម៉ូតូ បណ្ដាលឱ្យជ្រុលចង្កូត ធ្លាក់ចូលស្រះទឹក ដែលនៅខាងជើងផ្លូវក្រឡាប់លិចចូលទឹកតែម្ដង!។
*ក្រោយកើតហេតុភ្លាមៗ ពលរដ្ឋនិងសមត្ថកិច្ចបាននាំគ្នា អូសរថយន្តមកខាង និងទាញស្រង់យកសិស្សចេញពីក្នុងរថយន្តជាបន្តបន្ទាប់។
ប៉ុន្តែជាអកុសល ក្នុងចំណោមសិស្សទាំង២៦នាក់ ក្នុងរថយន្ត គឺបានស្លាប់៥នាក់ របួសធ្ងន់៣នាក់ ខណៈសិស្សផ្សេងទៀត មានសុវត្ថិភាព.!។
គូសបញ្ជាក់ដែរថា សិស្សដែលបានបាត់បង់អាយុជីវិតរួមមាន៖
១. សៀង សុផាវត្តី ភេទស្រី អាយុ១៤ឆ្នាំ រស់នៅភូមិចុងក្រូច ឃុំរាប ស្រុកពារាំង ខេត្តព្រៃវែង។
២. ឡេង យូលី ភេទស្រី នៅភូមិ ពហ៊ា ឃុំ កំពង់ពពិល ស្រុកពារាំង ខេត្តព្រៃវែង។
៣. លី នីតា ភេទស្រី អាយុ១៣ឆ្នាំ នៅភូមិកំពង់ពពិល ឃុំកំពង់ពពិល ស្រុកពារាំង ខេត្តព្រៃវែង។
៤. សីហា សួស្តី ភេទស្រី អាយុ១៤ឆ្នាំ រស់នៅភូមិ តាំងរលាង ឃុំកំពង់ពពិល ស្រុកពារាំង ខេត្តព្រៃវែង។
៥. ឃាង ឈីងឈីង ភេសស្រី អាយុ ១២ឆ្នាំនៅភូមិកំពង់ពពិល ឃុំកំពង់ពពិល ស្រុកពារាំង ខេត្តព្រៃវែង៕
