(ព្រៃវែង)៖ ថ្នាក់ដឹកនាំ ប៊ែលធី គ្រុប ដឹកនាំដោយ ឯកឧត្តម លី ប៊ុនឆៃ អគ្គនាយករង ប៊ែលធី គ្រុប និងជាប្រធានគណៈគ្រប់គ្រងនាយកសាខានៃសាលា ប៊ែលធី អន្តរជាតិ បានអញ្ជើញចូលរួមពិធីបុណ្យសពសិស្សឈ្មោះ សីហា សួស្តី ដែលបានទទួលមរណភាពដោយសារ ឧបទ្ទវហេតុគ្រោះថ្នាក់ចរាចរណ៍ (រថយន្ត គេចម៉ូតូ រេចង្កូត ធ្លាក់ចូលស្រះទឹក) កាលពីព្រឹកថ្ងៃទី១០ ខែវិច្ឆិកា ឆ្នាំ២០២៦ ស្ថិតនៅចំណុចផ្លូវជាតិលេខ៨ ក្នុងស្រុកខ្សាច់កណ្ដាល ខេត្តកណ្ដាល។
ក្នុងឱកាសចូលរួមពិធីបុណ្យសពនាល្ងាចទី១០.១១.២០២៦ ឯកឧត្តមអគ្គនាយករង បាននាំយកនូវ៖
១-សារលិខិតរំលែកមរណទុក្ខរបស់ ឯកឧត្តមបណ្ឌិត លី ឆេង តំណាងរាស្ត្រមណ្ឌលរាជធានីភ្នំពេញ ស្ថាបនិក និងជាអគ្គនាយក ប៊ែលធី គ្រុប
២-បច្ច័យចូលរួមរំលែកទុក្ខ
៣-ថវិកាដែលបានបង់ថ្លៃសិក្សារួច
៤-អាហារូបករណ៍១០០% សិក្សារយៈពេល ១២ឆ្នាំ ដោយឥតបង់ថ្លៃ សម្រាប់បងនិងប្អូនបង្កើតនៃសព។
ទៅជូនដល់ក្រុមគ្រួសារនៃសពក្មួយស្រី នៅគេហដ្ឋាន ស្ថិតក្នុងឃុំកំពង់ពពិល ស្រុកពារាំង ខេត្តព្រៃវែង។
ក្នុងហេតុការណ៍ដ៏សែនសោកសង្រេងនេះ យើងខ្ញុំជា ថ្នាក់ដឹកនាំ គណៈគ្រប់គ្រង បុគ្គលិក សាស្ត្រាចារ្យ លោកគ្រូ-អ្នកគ្រូ នៃប៊ែលធី គ្រុប ព្រមទាំងសិស្សានុសិស្សនៃសាលា ប៊ែលធី អន្តរជាតិ និងនិស្សិតនៃសាកលវិទ្យាល័យ ប៊ែលធី អន្តរជាតិទាំងអស់ សូមចូលរួមរំលែកមរណទុក្ខដោយក្តីអាឡោះអាល័យ និងសោកស្តាយយ៉ាងក្រៃលែងជាមួយលោក-លោកស្រី ជាមាតាបិតា និងក្រុមគ្រួសារនៃសព។
សូមឧទ្ទិសបួងសួងដល់ដួងវិញ្ញាណក្ខន្ធក្មួយស្រី សីហា សួស្តី បានទៅកាន់សុគតិភពកុំបីឃ្លៀងឃ្លាតឡើយ៕
