នៅថ្ងៃពុធ ទី១២ ខែវិច្ឆិកា កិច្ចប្រជុំដំបូងរបស់គណៈកម្មាធិការសំខាន់មួយក្នុងសភាអ៊ីស្រាអែល បានធ្លាក់ក្នុងភាពចលាចល ដោយសមាជិកសភាបានស្រែកជេរប្រមាថ និងរំខានគ្នាទៅវិញទៅមក រហូតដល់មានសមាជិកសភាស្ត្រីម្នាក់ត្រូវបានបណ្តេញចេញពីបន្ទប់ប្រជុំ។
សារព័ត៌មានAnadolu Agency។
លោក រ៉យ ហ្វូលមែន ប្រធានគណៈកម្មាធិការរៀបចំការងារសភា មកពីគណបក្ស Yashar បានបញ្ជាឱ្យលោកស្រី តាលី ហ្គតលីវ មកពីគណបក្សស្តាំនិយមជ្រុល Otzma Yehudit ចាកចេញពីកិច្ចប្រជុំ ដោយសារលោកស្រីបានកាត់ផ្តាច់សម្តីអ្នកដទៃជាបន្តបន្ទាប់។
ភាពតានតឹងក៏បានកើតឡើងរវាងសមាជិកសភាផ្សេងទៀតផងដែរ ដោយសមាជិកសភាស្ត្រីមួយចំនួនបានចោទប្រកាន់លោក អេរ៉េស តាដម៉័រ ថាជាចោរលួចអាវុធ ដោយសារលោកធ្លាប់ត្រូវបានផ្តន្ទាទោសពីបទលួចសម្ភារៈយោធាក្នុងពេលបំពេញកាតព្វកិច្ចយោធា។ ក្រោយមក លោកក៏បានប្រើពាក្យប្រមាថសមាជិកសភាស្ត្រីម្នាក់ទៀត ដែលបង្កឱ្យមានការតវ៉ាកាន់តែខ្លាំង។
មុនពេលកើតមានភាពចលាចល សភាអ៊ីស្រាអែលបានអនុម័តសមាសភាពគណៈកម្មាធិការនេះ ដោយមានសំឡេងគាំទ្រ ៦៣ ទល់នឹង ៥០ ដែលជាការបរាជ័យលើកដំបូងរបស់ក្រុមលោក បេនចាមីន នេតាន់យ៉ាហ៊ូ នៅក្នុងសភាថ្មី។
គណៈកម្មាធិការបណ្តោះអាសន្ននេះមានតួនាទីរៀបចំការងារសភា និងបង្កើតគណៈកម្មាធិការផ្សេងៗ ខណៈការចរចាបង្កើតរដ្ឋាភិបាលថ្មីកំពុងបន្ត។ ជាមួយគ្នានេះ សមាជិកសភាក៏បានអនុម័តឱ្យលោក អាវីកដ័រ លីប៊ែរមែន ដឹកនាំគណៈកម្មាធិការកិច្ចការបរទេស និងការពារជាតិបណ្តោះអាសន្នផងដែរ។
ភាពតានតឹងនេះកើតឡើងមុនការបោះឆ្នោតនៅថ្ងៃទី១៧ ខែវិច្ឆិកា ដើម្បីជ្រើសរើសប្រធានសភាថ្មី ខណៈលោក ហ្គាឌី អៃសិនខត កំពុងបន្តចរចាបង្កើតរដ្ឋាភិបាល បន្ទាប់ពីការបោះឆ្នោតកាលពីថ្ងៃទី២៧ ខែតុលា មិនទាន់អាចបង្កើតរដ្ឋាភិបាលបាន៕
