កាលពីថ្ងៃទី១៤ ខែវិច្ឆិកា ឆ្នាំ២០២៦ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានឱ្យដឹង ថា អ៊ុយក្រែន និងរុស្ស៊ី កំពុងពិភាក្សាអំពីការដោះដូរឈ្លើយសឹកទ្រង់ទ្រាយធំ ដែលអាចមានចំនួនពី១.២០០ ទៅ ១.៣០០ នាក់ពីភាគីនីមួយៗ។ លោកចាត់ទុកថា នេះជាលទ្ធផលសំខាន់បំផុតនៃកិច្ចពិភាក្សានាពេលថ្មីៗនេះនៅទីក្រុងអាប៊ូដាប៊ី។
សារព័ត៌មានAnadolu Agency។
លោកបានបញ្ជាក់ថា កិច្ចពិភាក្សាក៏បានលើកឡើងពីលទ្ធភាពនៃការឈប់បាញ់លើវិស័យថាមពលផងដែរ ប៉ុន្តែភាគីរុស្ស៊ីបានអះអាងថា ខ្លួនមិនមានសិទ្ធិអំណាចសម្រេចលើបញ្ហានេះទេ។ លោកក៏មិនឃើញមានសញ្ញាណថា រុស្ស៊ីចង់បញ្ឈប់ការវាយប្រហារលើហេដ្ឋារចនាសម្ព័ន្ធថាមពលរបស់អ៊ុយក្រែនឡើយ។
ចំណុចសំខាន់មួយទៀត លោកហ្សេលេនស្គីបានបង្ហើបថា សហរដ្ឋអាមេរិកបានសួរជាលើកដំបូងថា តើអ៊ុយក្រែនអាចព្រមដកកងកម្លាំងចេញពីតំបន់ដុនបាស ដើម្បីប្តូរយកសមាជិកភាពអង្គការណាតូដែរឬទេ។ លោកបញ្ជាក់ថា អ៊ុយក្រែនមិនចង់បោះបង់ទឹកដីរបស់ខ្លួនឡើយ ប៉ុន្តែអាចយកសំណើនេះទៅសួរយោបល់ប្រជាជន ប្រសិនបើមានការធានាសន្តិសុខច្បាស់លាស់ ការផ្គត់ផ្គង់អាវុធ និងថវិកាគ្រប់គ្រាន់ ព្រមទាំងផែនការស្តារប្រទេសឡើងវិញ។
ទោះជាយ៉ាងណា លោកបានបដិសេធមិនទទួលស្គាល់ទឹកដីដែលរុស្ស៊ីកាន់កាប់ថាជាទឹកដីរុស្ស៊ី និងមិនព្រមកែប្រែរដ្ឋធម្មនុញ្ញដើម្បីប្រកាសអព្យាក្រឹតភាពរបស់អ៊ុយក្រែនឡើយ។ លោកក៏បានអំពាវនាវឱ្យប្រទេសអឺរ៉ុបចូលរួមក្នុងជុំចរចាបន្ទាប់ជាមួយអ៊ុយក្រែន រុស្ស៊ី និងសហរដ្ឋអាមេរិកផងដែរ។
ជាមួយគ្នានេះ អ៊ុយក្រែនកំពុងត្រៀមខ្លួនសម្រាប់រដូវរងា ដោយត្រូវការប្រេងឥន្ធនៈ ម៉ាស៊ីនភ្លើង រថយន្តក្រុង និងប្រព័ន្ធការពារដែនអាកាសបន្ថែម។ ប្រទេសដាណឺម៉ាកបានប្រកាសផ្តល់ជំនួយផ្នែកការពារជាតិចំនួន ៦៤៥ លានអឺរ៉ូ និងជំនួយថាមពលចំនួន ២០ លានអឺរ៉ូ ដើម្បីគាំទ្រអ៊ុយក្រែន។
លោកហ្សេលេនស្គីបានបន្ថែមថា អ៊ុយក្រែនក៏កំពុងធ្វើការជាមួយសហភាពអឺរ៉ុប ដើម្បីជំរុញដំណើរការចូលជាសមាជិកសហភាពអឺរ៉ុបនៅឆ្នាំ២០២៧ ខាងមុខ៕
