នាយករដ្ឋមន្ត្រីអ៊ីស្រាអែល លោក បេនចាមីន នេតាន់យ៉ាហ៊ូ បានពិភាក្សាជាមួយលោក ហ្គាឌី អ៊ីសិនខត ដែលត្រូវបានប្រគល់ភារកិច្ចបង្កើតរដ្ឋាភិបាលថ្មី អំពីលទ្ធភាពបន្តការវាយប្រហារលើប្រទេសអ៊ីរ៉ង់ឡើងវិញ។ នេះបើយោងតាមការចុះផ្សាយរបស់ប្រព័ន្ធផ្សព្វផ្សាយអ៊ីស្រាអែល កាលពីថ្ងៃទី១៤ ខែវិច្ឆិកា ឆ្នាំ២០២៦។
សារព័ត៌មានAnadolu Agency។
តាមសារព័ត៌មាន Channel 12 លោកនេតាន់យ៉ាហ៊ូបានជួបលោកអ៊ីសិនខត ដើម្បីចែករំលែកព័ត៌មានសម្ងាត់ពាក់ព័ន្ធនឹងអ៊ីរ៉ង់ ដែលអាចធ្វើឱ្យលោកអ៊ីសិនខតផ្លាស់ប្តូរទស្សនៈចំពោះមូលហេតុនៃការចង់បើកការវាយប្រហារឡើងវិញ។ ទោះជាយ៉ាងណា លោកអ៊ីសិនខតមិនបានដឹងជាមុនថា ប្រធានទីភ្នាក់ងារស៊ើបការណ៍សម្ងាត់ Mossad លោក រ៉ូម៉ាន់ ហ្គោហ្វម៉ាន់ បានធ្វើដំណើរទៅទីក្រុងវ៉ាស៊ីនតោន ដើម្បីពិភាក្សាបញ្ហានេះឡើយ។
ជាមួយគ្នានេះ ប្រព័ន្ធផ្សព្វផ្សាយរដ្ឋ KAN បានរាយការណ៍ថា អគ្គសេនាធិការកងទ័ពអ៊ីស្រាអែល លោក អេយ៉ាល់ ហ្សាមៀរ គាំទ្រឱ្យមានប្រតិបត្តិការយោធាប្រឆាំងអ៊ីរ៉ង់ ប៉ុន្តែមិនយល់ថាពេលបច្ចុប្បន្នជាពេលវេលាសមស្របនោះទេ។ លោកចង់ឱ្យមានការសម្របសម្រួលជាមួយសហរដ្ឋអាមេរិក និងជ្រើសរើសពេលវេលាសមស្រប ដោយសារកងទ័ពមិនមើលឃើញថា អ៊ីរ៉ង់មានការគំរាមកំហែងបន្ទាន់ដែលតម្រូវឱ្យមានការវាយប្រហារថ្មីឡើយ។
ដោយឡែក ប្រធាន Mossad លោក ហ្គោហ្វម៉ាន់ បានជួបពិភាក្សាជាមួយប្រធាន CIA លោក ចន រ៉ាត់ក្លីហ្វ នៅទីក្រុងវ៉ាស៊ីនតោន ដើម្បីស្វែងរកការគាំទ្រពីសហរដ្ឋអាមេរិកចំពោះលទ្ធភាពវាយប្រហារអ៊ីរ៉ង់ឡើងវិញ។ កិច្ចពិភាក្សានេះផ្តោតលើកម្មវិធីនុយក្លេអ៊ែរ និងការអភិវឌ្ឍមីស៊ីលរយៈចម្ងាយឆ្ងាយរបស់អ៊ីរ៉ង់។
ការវិវត្តនេះកើតឡើងក្នុងពេលអ៊ីស្រាអែលកំពុងផ្លាស់ប្តូររដ្ឋាភិបាល បន្ទាប់ពីក្រុមលោកនេតាន់យ៉ាហ៊ូបាត់បង់សំឡេងភាគច្រើនក្នុងសភា។ ទន្ទឹមនឹងនេះ មានការព្រួយបារម្ភថា ការសម្រេចចិត្តផ្នែកយោធាមុនពេលបង្កើតរដ្ឋាភិបាលថ្មី អាចបង្កឱ្យមានជម្លោះយូរអង្វែងជាមួយអ៊ីរ៉ង់ និងប៉ះពាល់ដល់ដំណើរការបង្កើតរដ្ឋាភិបាលថ្មីផងដែរ៕
