កាលពីថ្ងៃទី១៥ ខែវិច្ឆិកា ឆ្នាំ២០២៦ អ្នកនាំពាក្យក្រសួងការបរទេសអ៊ីរ៉ង់ លោក អេសម៉ាអ៊ីល បាហ្គាអ៊ី (Esmaeil Baqaei) បានចោទប្រកាន់ទីភ្នាក់ងារថាមពលបរមាណូអន្តរជាតិ (IAEA) ថា រងឥទ្ធិពលពីសហរដ្ឋអាមេរិក និងបណ្តាប្រទេសអឺរ៉ុប ក្នុងការរាយការណ៍អំពីកម្មវិធីនុយក្លេអ៊ែររបស់អ៊ីរ៉ង់។
សារព័ត៌មានAnadolu Agency។
លោកបានរិះគន់ថា ទីភ្នាក់ងារនេះបានធ្វើរបាយការណ៍ដោយលម្អៀង និងមិនមានភាពយុត្តិធម៌ចំពោះកម្មវិធីនុយក្លេអ៊ែរដែលអ៊ីរ៉ង់អះអាងថា មានគោលបំណងសន្តិភាព។ លោកក៏បានលើកឡើងថា សកម្មភាពបែបនេះបានធ្វើឱ្យប៉ះពាល់យ៉ាងធ្ងន់ធ្ងរដល់ភាពជឿជាក់របស់ស្ថាប័នអន្តរជាតិមួយនេះ។ ជាមួយគ្នានេះ លោកបានចោទប្រកាន់ទីក្រុងវ៉ាស៊ីនតោនថា បានធ្វើឱ្យការទូត និងការចរចាបាត់បង់អត្ថន័យពិតប្រាកដ។
ការចោទប្រកាន់នេះកើតឡើងក្នុងពេលដែលភាពតានតឹងរវាងអ៊ីរ៉ង់ និងសហរដ្ឋអាមេរិកកំពុងកើនឡើង ជាពិសេសបន្ទាប់ពីអ៊ីរ៉ង់អះអាងថា បានប្រើដ្រូន ៦ គ្រឿង វាយប្រហារប្រព័ន្ធរ៉ាដាព្រមានជាមុនរបស់អាមេរិកនៅប្រទេសបារ៉ែន។ ចំណែកកងកម្លាំងការពារជាតិបារ៉ែនបានអះអាងថា ប្រព័ន្ធការពារដែនអាកាសរបស់ខ្លួនបានស្ទាក់ចាប់ និងបំផ្លាញការវាយប្រហារតាមអាកាសជាច្រើនរបស់អ៊ីរ៉ង់។
ភាពតានតឹងក្នុងតំបន់បានកើនឡើង ចាប់តាំងពីអាមេរិក និងអ៊ីស្រាអែលបើកការវាយប្រហារលើអ៊ីរ៉ង់កាលពីខែកុម្ភៈ។ ទោះបីមានបទឈប់បាញ់ក្នុងខែមេសាក៏ដោយ ការប្រយុទ្ធគ្នាបានផ្ទុះឡើងវិញក្នុងខែកក្កដា ដោយសារការចរចារវាងភាគីទាំងពីរជាប់គាំង៕
