(ភូកេត)៖ នៅវេលាទៀបភ្លឺឈានចូលថ្ងៃទី១៦ ខែវិច្ឆិកា ឆ្នាំ២០២៦ អគ្គិភ័យមួយបានឆាបឆេះ ហាងជួលម៉ូតូមួយកន្លែង នៅតំបន់ប៉ាតុង(Patong)ប្រទេសថៃ បណ្តាលឱ្យមនុស្ស ៣៨នាក់រងរបួស ដោយសារការស្រូបផ្សែងពុល និងធ្វើឱ្យអគារពាណិជ្ជកម្មកម្ពស់៤ជាន់ ចំនួន៥ខ្នង រងការខូចខាត។
ជាមួយគ្នានេះ ក្រុមអ្នកជួយសង្គ្រោះបានធ្វើការស្វែងរកមនុស្ស ដែលជាប់គាំងនៅខាងក្នុងអគារ។
សារព័ត៌មានKhaosod។
កម្លាំងពន្លត់អគ្គិភ័យមកពីសាលាក្រុងប៉ាតុង ក្រុមអ្នកស្ម័គ្រចិត្តជួយសង្គ្រោះមកពីមូលនិធិ Kusoldharm Phuket និងក្រុមគ្រូពេទ្យ មកពីមន្ទីរពេទ្យប៉ាតុង ត្រូវបានបញ្ជូនទៅកាន់ទីតាំងកើតហេតុ។
នៅពេលទៅដល់ ក្រុមពន្លត់អគ្គិភ័យបានឃើញអណ្តាតភ្លើងកំពុងឆាបឆេះយ៉ាងសន្ធោសន្ធៅនៅក្នុងអគារពាណិជ្ជកម្ម ដែលជាទីតាំងសម្រាប់លក់ និងជួលម៉ូតូ ដោយមានផ្សែងហុយយ៉ាងក្រាស់ចេញពីអគារនោះ។
រថយន្តពន្លត់អគ្គិភ័យចំនួន ៥គ្រឿងត្រូវបានដាក់ពង្រាយដើម្បីទប់ស្កាត់អគ្គិភ័យនេះ ដោយចំណាយពេលប្រហែល៤០ ទៅ ៥០នាទី ទើបអាចគ្រប់គ្រងស្ថានការណ៍បាន។
ទោះជាយ៉ាងណាក៏ដោយ នៅតែមានផ្កាភ្លើងអគ្គិសនី លេចឡើងជាបន្តបន្ទាប់ បន្ទាប់ពីអណ្តាតភ្លើងត្រូវបានពន្លត់អស់ហើយ ដែលតម្រូវឱ្យក្រុមពន្លត់អគ្គិភ័យបន្តត្រួតពិនិត្យសុវត្ថិភាពនៅកន្លែងកើតហេតុ។
អគ្គិភ័យនេះបានបង្កការខូចខាតដល់អគារពាណិជ្ជកម្មកម្ពស់ ៤ជាន់ ចំនួន៥ ខ្នង ដែលនៅជាប់គ្នា ព្រមទាំងម៉ូតូមួយចំនួនដែលបានចតទុកនៅទីតាំងអាជីវកម្មនោះផងដែរ។
សាក្សីរៀបរាប់ពីការរត់គេចខ្លួន ចេញពីផ្សែងដ៏ក្រាស់ថា ពួកគេកំពុងដេកលេងទូរស័ព្ទនៅខាងក្នុងអគារ ស្រាប់តែបានឮសំឡេង ដែលបង្ហាញថាមានអគ្គិភ័យកើតឡើង៕

