លោក Ahmad Tibi មេដឹកនាំសភានៃគណបក្ស Arab Joint List កាលពីថ្ងៃអាទិត្យ ទី១៥ ខែវិច្ឆិកា បានទាមទារឱ្យមានការស៊ើបអង្កេតព្រហ្មទណ្ឌលើនាយករដ្ឋមន្ត្រីអ៊ីស្រាអែល លោក Benjamin Netanyahu និងជំនួយការរបស់លោក ពាក់ព័ន្ធនឹងការចោទប្រកាន់ថា បានប្រើប្រាស់ស្ថាប័នសន្តិសុខ ដើម្បីជ្រៀតជ្រែកក្នុងការបោះឆ្នោតសភា។
សារព័ត៌មានAnadolu Agency។
ការទាមទារនេះធ្វើឡើងបន្ទាប់ពីសារព័ត៌មាន Channel 12 បានចុះផ្សាយការស៊ើបអង្កេតមួយ ដោយបង្ហាញថា ប្រធានខុទ្ទកាល័យរបស់លោក Netanyahu ត្រូវបានចោទថា បានទាក់ទងទៅប៉ូលិសមុនថ្ងៃបោះឆ្នោត ដោយចោទប្រកាន់សកម្មជនបីនាក់នៃគណបក្ស Ra’am ថា មានប្រាក់ និងប័ណ្ណទូទាត់ ដើម្បីទាក់ទាញសំឡេងអ្នកបោះឆ្នោត។ ប៉ូលិសបានចុះឆែកឆេរផ្ទះ និងឃាត់ខ្លួនពួកគេ ដោយគ្មានដីកាត្រឹមត្រូវ តាមការរាយការណ៍របស់សារព័ត៌មាន។
លោក Tibi បានចាត់ទុកសកម្មភាពដែលត្រូវបានចោទប្រកាន់នេះថា ជាការប្រព្រឹត្តបែបក្រុមម៉ាហ្វីយ៉ា ដែលអាចប៉ះពាល់ដល់គ្រឹះនៃលទ្ធិប្រជាធិបតេយ្យ។ លោកក៏បានអំពាវនាវឱ្យអគ្គរដ្ឋអាជ្ញាបើកការស៊ើបអង្កេតជាបន្ទាន់ផងដែរ។
ជាមួយគ្នានេះ លោក Gadi Eisenkot មេដឹកនាំគណបក្ស Yashar ក៏បានទាមទារឱ្យស៊ើបអង្កេតលើការពាក់ព័ន្ធរបស់ការិយាល័យនាយករដ្ឋមន្ត្រី និងស្ថាប័នសន្តិសុខផងដែរ ដោយព្រមានថា ករណីនេះអាចបង្កការគំរាមកំហែងយ៉ាងធ្ងន់ធ្ងរដល់លទ្ធិប្រជាធិបតេយ្យរបស់អ៊ីស្រាអែល។
ទោះជាយ៉ាងណា ការចោទប្រកាន់ទាំងនេះនៅតែត្រូវការការស៊ើបអង្កេត និងផ្ទៀងផ្ទាត់តាមផ្លូវច្បាប់៕

