ក្រុមហ៊ុន Meta Platforms បានប្រកាសកាលពីថ្ងៃសុក្រទី៧ខែវិច្ឆិកា ថាខ្លួននឹងវិនិយោគទឹកប្រាក់ ៦០០ ពាន់លានដុល្លារលើហេដ្ឋារចនាសម្ព័ន្ធ និងការងារនៅសហរដ្ឋអាមេរិកក្នុងរយៈពេលបីឆ្នាំខាងមុខ ដែលភាគច្រើនដើម្បីសាងសង់មជ្ឈមណ្ឌលទិន្នន័យបញ្ញាសិប្បនិម្មិត (AI)។ ក្រុមហ៊ុននេះបាននិយាយថា ការវិនិយោគដ៏ធំសម្បើមនេះនឹងជួយជំរុញមហិច្ឆតា AI របស់ខ្លួន ខណៈដែលក្រុមហ៊ុនកំពុងប្រណាំងប្រជែងគ្នាដើម្បីសាងសង់ហេដ្ឋារចនាសម្ព័ន្ធដែលត្រូវការសម្រាប់ការគណនាកម្រិតខ្ពស់។
ប្រភពពីសារព័ត៌មានEconomic Times។
តាមរបាយការណ៍ បានឲ្យដឹងថា ការវិនិយោគនេះនឹងត្រូវអនុវត្តមុនឆ្នាំ ២០២៨ សម្រាប់ប្រតិបត្តិការរបស់ Meta នៅអាមេរិក។ Meta បានពិពណ៌នាថា វាជាការរៀបចំសម្រាប់ការកើនឡើងនៃតម្រូវការបញ្ញាសិប្បនិម្មិត។ ផ្នែកមួយនៃគម្រោងនេះរួមមាន ស្ថាបនាមជ្ឈមណ្ឌលទិន្នន័យធំៗ ការបង្កើតការងារ កម្មវិធីថាមពលស្អាត ការសន្សំទឹក និងមូលនិធិសហគមន៍។
នេះជាការប្តេជ្ញាធំបំផុតមួយ ដែលបង្ហាញថា ក្រុមហ៊ុនជឿជាក់ថា ហេដ្ឋារចនាសម្ព័ន្ធបញ្ញាសិប្បនិម្មិត (ដូចជា មជ្ឈមណ្ឌលទិន្នន័យ និងប្រព័ន្ធគណនាកុំព្យូទ័រ) នឹងក្លាយជាបេះដូងនៃអាជីវកម្មរបស់ខ្លួននៅអនាគត។ វាក៏ជាការវិនិយោគធំមួយបំផុតដែលបង្ហាញថា ការអភិវឌ្ឍបញ្ញាសិប្បនិម្មិត មិនមែនជារឿងកម្មវិធីតែប៉ុណ្ណោះទេ ប៉ុន្តែត្រូវការមូលធនធំនៅផ្នែកឧបករណ៍ និងហេដ្ឋារចនាសម្ព័ន្ធផងដែរ។ មជ្ឈមណ្ឌលទិន្នន័យនេះនឹងនាំមកនូវការងារសំណង់ ការងារប្រតិបត្តិ ប្រភេទសេវាកម្មជាច្រើន និងការកែលម្អបណ្តាញអគ្គិសនី និងសេវាសាធារណៈក្នុងតំបន់។ Meta បានភ្ជាប់គម្រោងនេះជាមួយថាមពលស្អាត ការកែលម្អបណ្តាញអគ្គិសនី និងការកាត់បន្ថយការប្រើទឹក ដើម្បីបង្កើនចីរភាព។
គួរជម្រាបថា Meta ត្រូវប្រកួតប្រជែងជាមួយក្រុមហ៊ុនធំៗដូចជា Google និង Microsoft។ ប្រសិនបើវិស័យ AI របស់ខ្លួនបរាជ័យ អាចនាំឲ្យហេដ្ឋារចនាសម្ព័ន្ធមិនត្រូវបានប្រើប្រាស់ពេញលេញ។ ក្រៅពីនេះ ងាកកបញ្ហាស្ថានភាពសេដ្ឋកិច្ចសកលដូចជា វិបត្តិសេដ្ឋកិច្ច ការផ្លាស់ប្តូរគោលនយោបាយ សង្វាក់ផ្គត់ផ្គង់ និងតម្លៃថាមពល អាចមានឥទ្ធិពលដល់គម្រោងនេះផងដែរ៕