កម្មករកាត់ដេរនៅប្រទេសបង់ក្លាដែសបានបន្តធ្វើបាតុកម្មកាលពីថ្ងៃទី៥ ខែវិច្ឆិកា ឆ្នាំ២០២៦ ទោះបីជាក្រុមប្រឹក្សាកំណត់ប្រាក់ឈ្នួលបានសម្រេចរៀបចំរចនាសម្ព័ន្ធប្រាក់ឈ្នួលថ្មីចាប់ពីខែធ្នូខាងមុខក៏ដោយ។ ការតវ៉ានេះបានបង្ខំឱ្យរោងចក្រជាង១០០កន្លែងផ្អាកប្រតិបត្តិការ។
សារព័ត៌មានReuter។
ការតវ៉ាដែលចាប់ផ្តើមតាំងពីថ្ងៃសៅរ៍ បានបណ្តាលឱ្យរោងចក្ររាប់រយកន្លែងបិទទ្វារ និងរំខានដល់ដំណើរការផលិតកម្ម ព្រមទាំងបង្កការព្រួយបារម្ភអំពីការយឺតយ៉ាវក្នុងការដឹកជញ្ជូនទំនិញនាំចេញ។ បង់ក្លាដែសគឺជាប្រទេសនាំចេញសម្លៀកបំពាក់ធំជាងគេលំដាប់ទី២ លើពិភពលោក បន្ទាប់ពីប្រទេសចិន។
នៅតំបន់អាស៊ូលីយ៉ា ជាមជ្ឈមណ្ឌលផលិតសម្លៀកបំពាក់ដ៏សំខាន់មួយ កម្មករបានចាកចេញពីរោងចក្រ និងបិទផ្លូវធំ ដើម្បីទាមទារឱ្យមានការប្រកាសច្បាស់លាស់អំពីការដំឡើងប្រាក់ឈ្នួល។ ជាការឆ្លើយតប ប៉ូលិសបានប្រើឧស្ម័នបង្ហូរទឹកភ្នែក និងគ្រាប់បែកបន្លាច បន្ទាប់ពីក្រុមបាតុករគប់ដុំឥដ្ឋ និងបំផ្លាញរថយន្តប៉ូលិស។
បច្ចុប្បន្ន ក្រុមប្រឹក្សាកំណត់ប្រាក់ឈ្នួលមិនទាន់សម្រេចថា នឹងដំឡើងប្រាក់ឈ្នួលចំនួនប៉ុន្មាននៅឡើយទេ ខណៈកម្មករទាមទារឱ្យប្រាក់ឈ្នួលអប្បបរមាកើនឡើងលើសពីពីរដង។ ទោះជាយ៉ាងណា ស្ថានភាពនៅតំបន់សាវ៉ា និងហ្សាហ្ស៊ីពួរ មានភាពស្ងប់ស្ងាត់ជាងមុន ដោយកម្មករមួយចំនួនបានវិលត្រឡប់ទៅធ្វើការវិញ៕
