ប្រធានាធិបតីរុស្ស៊ី លោក វ្ល៉ាឌីមៀរ ពូទីន កាលពីថ្ងៃព្រហស្បតិ៍ ទី៥ ខែវិច្ឆិកា បានបញ្ជាក់ថា រុស្ស៊ីឱ្យតម្លៃខ្ពស់ចំពោះកិច្ចខិតខំប្រឹងប្រែងរបស់អយ្យកោអយ្យការក្រុងយេរូសាឡឹម លោក ធីអូហ្វីឡូសទី៣ ក្នុងការរក្សា និងពង្រឹងទំនាក់ទំនងជាមួយសាសនាចក្រគ្រិស្តអូស្សូដក់របស់រុស្ស៊ី។
សារព័ត៌មានAnadolu Agency។
ការលើកឡើងនេះធ្វើឡើងក្នុងជំនួបរវាងលោក ពូទីន លោក ធីអូហ្វីឡូសទី៣ និងអយ្យកោ គីរីល នៃសាសនាចក្រគ្រិស្តអូស្សូដក់រុស្ស៊ី នៅវិមានក្រឹមឡាំង ក្នុងអំឡុងពេលបំពេញទស្សនកិច្ចផ្លូវការរបស់លោក ធីអូហ្វីឡូសទី៣ នៅទីក្រុងម៉ូស្គូ។
មុនជំនួបនេះ អយ្យកោទាំងពីរបានពិភាក្សាអំពីទំនាក់ទំនងរវាងសាសនាចក្រទាំងពីរ បញ្ហាប្រឈមក្នុងទំនាក់ទំនងរវាងសាសនាចក្រគ្រិស្តអូស្សូដក់ និងស្ថានភាពរបស់គ្រិស្តសាសនិកនៅតំបន់មជ្ឈិមបូព៌ា។ ពួកគេក៏បានពិភាក្សាអំពីការត្រៀមរៀបចំព្រឹត្តិការណ៍នៅប្រទេសហ្ស៊កដានី ក្នុងឆ្នាំ២០៣០ ដើម្បីរំឭកខួបនៃពិធីបុណ្យជ្រមុជទឹករបស់ព្រះយេស៊ូគ្រិស្តផងដែរ។
ក្នុងឱកាសនោះ លោក ពូទីន បានប្រគល់មេដាយមិត្តភាពដល់លោក ធីអូហ្វីឡូសទី៣ ដើម្បីជាការទទួលស្គាល់ចំពោះការរួមចំណែកក្នុងការពង្រឹងមិត្តភាព កិច្ចសហប្រតិបត្តិការ និងទំនាក់ទំនងផ្នែកសាសនារវាងរុស្ស៊ី និងសាសនាចក្រក្រុងយេរូសាឡឹម៕
