ប្រទេសកាតា គុយវ៉ែត បារ៉ែន និងហ្ស៊កដានី កាលពីថ្ងៃទី៥ ខែវិច្ឆិកា បានថ្កោលទោសយ៉ាងខ្លាំងចំពោះការប៉ុនប៉ងវាយប្រហារដោយមីស៊ីលបាលីស្ទិករបស់ក្រុមហ៊ូទីនៅប្រទេសយេម៉ែន សំដៅទៅកាន់តំបន់ម៉ាឌីណាប្រទេសអារ៉ាប៊ីសាអូឌីត។
សារព័ត៌មានAnadolu Agency។
ប្រទេសទាំងនេះបានចាត់ទុកសកម្មភាពនេះថា ជាការរំលោភលើអធិបតេយ្យភាពរបស់អារ៉ាប៊ីសាអូឌីត ច្បាប់អន្តរជាតិ និងជាការគំរាមកំហែងដល់សុវត្ថិភាពប្រជាពលរដ្ឋ ព្រមទាំងទីតាំងសាសនាដ៏ពិសិដ្ឋរបស់សាសនាអ៊ីស្លាម។ ពួកគេក៏បានបញ្ជាក់ពីការគាំទ្រយ៉ាងពេញទំហឹងចំពោះអារ៉ាប៊ីសាអូឌីត ក្នុងការការពារសន្តិសុខ និងដែនអធិបតេយ្យភាពរបស់ខ្លួន។
ក្រុមចម្រុះដឹកនាំដោយអារ៉ាប៊ីសាអូឌីត បានឱ្យដឹងថា ប្រព័ន្ធការពារដែនអាកាសរបស់ខ្លួនបានស្ទាក់ចាប់ និងបំផ្លាញមីស៊ីលមួយគ្រាប់ មុនពេលទៅដល់គោលដៅ ហើយក៏បានបាញ់ទម្លាក់ដ្រូនមួយគ្រឿងទៀតនៅតំបន់ភាគខាងកើតប្រទេសផងដែរ។ ទោះជាយ៉ាងណា ក្រុមហ៊ូទីបានបដិសេធការចោទប្រកាន់ថា ខ្លួនបានកំណត់គោលដៅវាយប្រហារទៅលើតំបន់ម៉ាឌីណា។
គួរបញ្ជាក់ថា ប្រទេសយេម៉ែនបានធ្លាក់ក្នុងសង្គ្រាមស៊ីវិលចាប់តាំងពីខែកញ្ញា ឆ្នាំ២០១៤ បន្ទាប់ពីក្រុមហ៊ូទីដណ្តើមកាន់កាប់រដ្ឋធានីសាណា និងតំបន់មួយចំនួន។ ចាប់ពីខែមីនា ឆ្នាំ២០១៥ អារ៉ាប៊ីសាអូឌីតបានដឹកនាំក្រុមចម្រុះអារ៉ាប់គាំទ្ររដ្ឋាភិបាលយេម៉ែនដែលទទួលស្គាល់ជាអន្តរជាតិ។ ការប្រយុទ្ធគ្នាបានកើនឡើងក្នុងរយៈពេលប៉ុន្មានសប្តាហ៍ចុងក្រោយនេះ ដោយក្រុមហ៊ូទីបានបន្តបាញ់មីស៊ីល និងបង្ហោះដ្រូនវាយប្រហារលើទឹកដីអារ៉ាប៊ីសាអូឌីត៕
