មេដឹកនាំ ដែលមកពីប្រទេសជាច្រើនដែលរងទុក្ខដោយផលប៉ះពាល់ដ៏ធ្ងន់ធ្ងរពីវិបត្តិអាកាសធាតុ រួមទាំងព្យុះសង្ឃរា ទឹកជំនន់ និងការបាត់បង់ធនធានធម្មជាតិ បានប្រមូលផ្តុំគ្នានៅប្រទេសប្រេស៊ីល ក្នុងកិច្ចប្រជុំកំពូលអាកាសធាតុអង្គការសហប្រជាជាតិ COP30 ដើម្បីអំពាវនាវឱ្យមានសកម្មភាពបន្ទាន់ និងការទទួលខុសត្រូវពីប្រទេសដែលផលិតឧស្ម័នបំភាយច្រើនបំផុត។
ប្រភពពីសារព័ត៌មាន Al Jazeera នៅថ្ងៃទី8 ខែវិច្ឆិកា ឆ្នាំ 2025។
កិច្ចប្រជុំនេះបានប្រព្រឹត្តឡើងនៅ គែមព្រៃអាម៉ាហ្សូន ដែលកំពុងត្រូវបានកាប់បំផ្លាញយ៉ាងឆាប់រហ័ស។ មេដឹកនាំជាច្រើនបានសង្កត់ធ្ងន់លើតម្រូវការកែលម្អតុល្យភាពរវាងប្រទេសកំពុងអភិវឌ្ឍន៍ ដែលរងផលប៉ះពាល់យ៉ាងខ្លាំងពីអាកាសធាតុក្តៅ និងប្រទេសអ្នកមានដែលជាអ្នកបង្កឧស្ម័នកាបូនភាគច្រើន។
លោក Luiz Inácio Lula da Silva ប្រធានាធិបតីប្រេស៊ីល បានអំពាវនាវឱ្យមានផែនការជាក់លាក់ក្នុងការបញ្ឈប់ការកាប់បំផ្លាញព្រៃឈើ បន្ថយការប្រើប្រាស់ឥន្ធនៈហ្វូស៊ីល និងវិនិយោគលើបច្ចេកវិទ្យាបៃតង។ លោកបាននិយាយថាពិភពលោកមិនអាចពន្យារពេលទៀតបានទេ ប្រទេសអ្នកមានត្រូវធ្វើអ្វីមួយ ដើម្បីទប់ស្កាត់វិបត្តិដែលពួកគេបង្កើត៕