មន្ត្រីសុខាភិបាលហ្គាហ្សាបានប្រកាសថា ចាប់តាំងពីការវាយប្រហារដំបូងរបស់ក្រុមហាម៉ាសលើអ៊ីស្រាអែលនៅថ្ងៃទី ៧ ខែតុលា ឆ្នាំ ២០២៣ មកប្រជាជនប៉ាឡេស្ទីនជាង ៦៩,០០០ នាក់ត្រូវបានសម្លាប់ ហើយមានអ្នករងរបួសជាង ១៧០,០០០ នាក់ក្នុងសង្គ្រាមដ៏យូរអង្វែងរវាងអ៊ីស្រាអែល និងហាម៉ាស។
ប្រភពពីសារព័ត៌មានAp នៅថ្ងៃទី៨ខែវិច្ឆិកា។
តាមរបាយការណ៍របស់ ក្រសួងសុខាភិបាលហ្គាហ្សា ចំនួនអ្នកស្លាប់បានកើនដល់ ៦៩,១៦៩ នាក់ ខណៈការស្លាប់ថ្មីៗត្រូវបានគេជឿថាមកពីសាកសពជាច្រើនដែលត្រូវបានរកឃើញក្រោមគំនរបាក់បែក បន្ទាប់ពីការប្រកាសបទឈប់បាញ់។ មន្ត្រីក៏បានបញ្ជាក់ថា ការកំណត់អត្តសញ្ញាណសាកសពដែលមិនស្គាល់ពីមុនក៏ជាហេតុមួយនៃការកើនឡើងនៃចំនួននេះផងដែរ។
ការប្រកាសនេះកើតឡើងក្នុងពេលដែលអ៊ីស្រាអែលបានប្រគល់សាកសពជនជាតិប៉ាឡេស្ទីនចំនួន ១៥ នាក់ ត្រឡប់ទៅកាន់ហ្គាហ្សា នៅថ្ងៃសៅរ៍ ទន្ទឹមនឹងការប្តូរសាកសពរបស់ចំណាប់ខ្មាំងអ៊ីស្រាអែលម្នាក់ ដែលត្រូវបានប្រគល់មកវិញដោយក្រុមហាម៉ាស ក្រោមលក្ខខណ្ឌនៃកិច្ចព្រមព្រៀងឈប់បាញ់ដ៏ទន់ខ្សោយដែលសម្របសម្រួលដោយសហរដ្ឋអាមេរិក។
សូមបញ្ជាក់ថា៖ ស្ថានភាពនៅហ្គាហ្សានៅតែតានតឹង ទោះមានបទឈប់បាញ់ក៏ដោយ។ អង្គការមនុស្សធម៌បានបន្តអំពាវនាវឱ្យមានការអនុញ្ញាតចូលជំនួយយ៉ាងសេរី ដើម្បីជួយប្រជាជនរាប់លាននាក់ដែលនៅតែរស់នៅក្រោមស្ថានភាពអនាថា និងខ្វះខាតធនធានមូលដ្ឋាន៕