យ៉ាងហោចណាស់មានមនុស្សបួននាក់បានស្លាប់ នៅពេលដែលទូកពីរគ្រឿងដែលដឹកជនអន្តោប្រវេសន៍ និងអ្នកស្វែងរកសិទ្ធិជ្រកកោនបានក្រឡាប់នៅឆ្នេរសមុទ្រលីប៊ី នេះបើយោងតាមអង្គការអឌ្ឍចន្ទក្រហមលីប៊ី។
ប្រភពពីសារព័ត៌មានAANews។
នៅក្នុងសេចក្តីថ្លែងការណ៍មួយកាលពីថ្ងៃសៅរ៍ អង្គការនេះបាននិយាយថា ហេតុការណ៍នេះបានកើតឡើងនៅឆ្នេរសមុទ្រទីក្រុង al-Khums កាលពីយប់ថ្ងៃព្រហស្បតិ៍។
អាល់ឃុមស៍ គឺជាទីក្រុងឆ្នេរសមុទ្រមួយ ដែលមានចម្ងាយប្រហែល ១១៨ គីឡូម៉ែត្រ (៧៣ ម៉ាយ) ភាគខាងកើតនៃរដ្ឋធានីទ្រីប៉ូលី។
អឌ្ឍចន្ទក្រហមបាននិយាយថា ទូកទីមួយដឹកមនុស្ស ២៦ នាក់មកពីប្រទេសបង់ក្លាដែស ដែលក្នុងនោះមាន៤នាក់បានស្លាប់។ ទូកទីពីរបានដឹកមនុស្ស៦៩នាក់ រួមទាំងជនជាតិអេហ្ស៊ីបពីរនាក់ និងជនជាតិស៊ូដង់រាប់សិបនាក់ ហើយប្រាំបីនាក់ក្នុងចំណោមពួកគេជាកុមារ។
គួរជម្រាបថា លីប៊ីបានក្លាយជាផ្លូវឆ្លងកាត់សម្រាប់ជនអន្តោប្រវេសន៍ និងអ្នកស្វែងរកសិទ្ធិជ្រកកោនដែលរត់គេចពីជម្លោះ និងភាពក្រីក្រទៅកាន់អឺរ៉ុប ចាប់តាំងពីការដួលរលំនៃមេដឹកនាំផ្តាច់ការ មូអាម៉ា ហ្គាដាហ្វី ក្នុងឆ្នាំ ២០១១ ក្នុងអំឡុងពេលនៃការបះបោរដែលគាំទ្រដោយណាតូ៕