កាលពីថ្ងៃទី២៧ខែវិច្ឆិកា រដ្ឋាភិបាលជប៉ុន បានបដិសេធយ៉ាងខ្លាំងចំពោះរបាយការណ៍មួយរបស់ The Wall Street Journal (WSJ) ដែលអះអាងថា ប្រធានាធិបតីសហរដ្ឋអាមេរិក លោក Donald Trump បានណែនាំឱ្យនាយករដ្ឋមន្ត្រីជប៉ុន លោកស្រីSanae Takaichi មិនឲ្យមានសកម្មភាពណាដែលធ្វើឱ្យទីក្រុងប៉េកាំងខឹងទាក់ទងនឹងបញ្ហាអធិបតេយ្យភាពតៃវ៉ាន់។
ប្រភពពីសារព័ត៌មានAl jazeera។
ក្នុងសន្និសីទសារព័ត៌មានកាលពីថ្ងៃព្រហស្បតិ៍ អ្នកនាំពាក្យរដ្ឋាភិបាលជាន់ខ្ពស់ Minoru Kihara បានបដិសេធថា របាយការណ៍ដែលចែងថា លោក Trump បានផ្តល់ដំបូន្មានដូច្នោះគឺគ្មានមូលដ្ឋានការពិតឡើយ។ គាត់បានបន្តថា រដ្ឋាភិបាលជប៉ុនមិនអាចផ្ដល់ព័ត៌មានលម្អិតបន្ថែមអំពីការហៅទូរស័ព្ទរវាងមេដឹកនាំទាំងពីរនោះបានទេ ព្រោះវាអាចពាក់ព័ន្ធនឹងការផ្លាស់ប្តូរការទូតដែលមានភាពងាយរងផលប៉ះពាល់ផ្នែកយុទ្ធសាស្ត្រ។
ជម្លោះការបកស្រាយផ្នែកយោធានេះបានដើមកំណើតឡើង បន្ទាប់ពីនាយករដ្ឋមន្ត្រី Takaichi បាននិយាយកាលពីដើមខែថា ជប៉ុនអាចពិចារណាចូលរួមធ្វើអន្តរាគមន៍យោធា ប្រសិនបើតៃវ៉ាន់ត្រូវរងការវាយប្រហារពីចិន។ ការកត់សម្គាល់របស់នាយករដ្ឋមន្ត្រីបានបង្កការខឹងសម្បារយ៉ាងខ្លាំងពីរដ្ឋាភិបាលប៉េកាំង។
បន្ទាប់ពីព្រឹត្តិការណ៍នោះ មេដឹកនាំចិន Xi Jinping បានលើកបញ្ហានេះឡើងជាមួយ លោក Trump ក្នុងការហៅទូរស័ព្ទនៅថ្ងៃចន្ទ ដោយសំដៅថាការរួមបញ្ចូលតៃវ៉ាន់វិញ គឺជាផ្នែកសំខាន់នៃសណ្តាប់ធ្នាប់អន្តរជាតិក្រោយសង្គ្រាម។
WSJ បានផ្សព្វផ្សាយថា មិនយូរបន្ទាប់ពីការហៅទូរស័ព្ទរវាង លោក Trump និងលោក Xi នោះទេ ប្រធានាធិបតីអាមេរិក បានទូរស័ព្ទទៅកាន់នាយករដ្ឋមន្ត្រី Takaichi ហើយបានណែនាំកុំឲ្យជប៉ុនធ្វើសកម្មភាពដែលអាច ញុះញង់ការខឹងសម្បាររបស់ទីក្រុងប៉េកាំង៕