យោធាអ៊ីស្រាអែលបានសម្លាប់ជនជាតិប៉ាឡេស្ទីនចំនួនប្រាំពីរនាក់ ដែលជាការរំលោភចុងក្រោយរបស់ខ្លួនលើបទឈប់បាញ់ដែលសម្របសម្រួលដោយសហរដ្ឋអាមេរិកនៅក្នុងតំបន់ហ្គាហ្សា ហើយបានប្រកាសថាខ្លួននឹងបើកច្រកឆ្លងកាត់រ៉ាហ្វាសម្រាប់តែការចេញចូលរបស់ប្រជាជនពីទឹកដីដែលហែកហួរដោយសង្គ្រាមប៉ុណ្ណោះ។
ប្រភពពីសារព័ត៌មានAljazeera។
ការសម្លាប់កាលពីថ្ងៃពុធនេះ បានកើតឡើងបន្ទាប់ពីយោធាអ៊ីស្រាអែលបានចោទប្រកាន់ក្រុមហាម៉ាសថាបានវាយប្រហារ និងធ្វើឱ្យទាហានរបស់ខ្លួនបួននាក់រងរបួសនៅភាគខាងត្បូងរ៉ាហ្វា ជិតព្រំដែនហ្គាហ្សាជាមួយអេហ្ស៊ីប។
យោងតាមក្រុមគ្រូពេទ្យ ជនរងគ្រោះនៃការវាយប្រហាររបស់អ៊ីស្រាអែល រួមមានជនជាតិប៉ាឡេស្ទីនពីរនាក់ ដែលត្រូវបានសម្លាប់ដោយការបាញ់ប្រហាររបស់អ៊ីស្រាអែល នៅក្នុងសង្កាត់ Zeitoun ភាគខាងជើងនៃទីក្រុងហ្គាហ្សា និងប្រាំនាក់ ដែលត្រូវបានសម្លាប់ នៅក្នុងការវាយប្រហារលើជំរំ al-Mawasi ភាគខាងត្បូង។
ក្រុមហាម៉ាសបានថ្កោលទោសការវាយប្រហារនេះ ដោយពណ៌នាថាវាជាឧក្រិដ្ឋកម្មសង្គ្រាមដែលបង្ហាញពីការមិនអើពើរបស់អ៊ីស្រាអែលចំពោះកិច្ចព្រមព្រៀងឈប់បាញ់។ ក្រុមប៉ាឡេស្ទីនបានទាមទារឱ្យអ្នកសម្របសម្រួល អេហ្ស៊ីប កាតា និងសហរដ្ឋអាមេរិក ទប់ស្កាត់យោធាអ៊ីស្រាអែល៕