អង្គការUNICEF បានឱ្យដឹងកាលពីថ្ងៃសុក្រទី២៥.០៩.២០២៦ថា កុមារប្រហែល៧១,០០០នាក់ត្រូវបានបង្ខំឱ្យចាកចេញពីលំនៅឋានរបស់ពួកគេនៅក្នុងប្រទេសយេម៉ែន ។
ក្នុងរយៈពេល៣សប្តាហ៍កន្លងមកនេះ ចំពេលដែលមានជម្លោះកាន់តែធ្ងន់ធ្ងរឡើង ដោយបានព្រមានថា ភាពអត់ឃ្លាន និងការភៀសខ្លួនកំពុងធ្វើឱ្យកុមារប្រឈមនឹងហានិភ័យកាន់តែខ្លាំងឡើង។
លោក Akhil Iyer តំណាងអង្គការ UNICEF ប្រចាំប្រទេសយេម៉ែន បានប្រាប់អ្នកសារព័ត៌មាននៅទីក្រុងហ្សឺណែវថា មនុស្សជិត ១៣០,០០០នាក់ រួមទាំងកុមារ ៧១,០០០នាក់ផងដែរ បានភៀសខ្លួនក្នុងអំឡុងពេលនោះ ដោយភាគច្រើនត្រូវបានបង្ខំឱ្យចាកចេញពី ឬផ្លាស់ទីលំនៅនៅក្នុងខេត្ត Taiz ដែលស្ថិតនៅភាគនិរតីនៃប្រទេស។
លោក Iyer បានមានប្រសាសន៍ថា៖ ជម្លោះកំពុងបង្កឱ្យមានភាពអត់ឃ្លាន ហើយភាពអត់ឃ្លានធ្វើឱ្យកុមារកាន់តែងាយរងគ្រោះដោយសារជម្លោះ។
ក្នុងរយៈពេលប៉ុន្មានសប្តាហ៍ថ្មីៗនេះ អង្គការ UNICEF បានធ្វើការត្រួតពិនិត្យសុខភាពកុមារជិត ២,៩០០នាក់ តាមរយៈក្រុមចល័តផ្នែកអាហារូបត្ថម្ភនៅក្នុងតំបន់ដែលខ្លួនអាចចូលទៅដល់ដោយសុវត្ថិភាពដើម្បីផ្តល់ជំនួយមនុស្សធម៌។
លទ្ធផលបានបង្ហាញថា កុមារជាងមួយក្នុងចំណោមបួននាក់មានបញ្ហាខ្វះអាហារូបត្ថម្ភធ្ងន់ធ្ងរ (acute malnutrition)។
ខណៈដែលកុមារប្រហែល ២០០នាក់កំពុងទទួលរងនូវកង្វះអាហារូបត្ថម្ភធ្ងន់ធ្ងរកម្រិតខ្ពស់បំផុត (severe acute malnutrition)។
លោកបញ្ជាក់ថា នៅទូទាំងប្រទេសយេម៉ែន កុមារជាង២,២លាននាក់ដែលមានអាយុក្រោម ៥ឆ្នាំ ត្រូវបានគេព្យាករណ៍ថានឹងជួបប្រទះបញ្ហាខ្វះអាហារូបត្ថម្ភធ្ងន់ធ្ងរនៅឆ្នាំនេះ រួមទាំងកុមារជាងកន្លះលាននាក់ដែលកំពុងប្រឈមមុខនឹងកង្វះអាហារូបត្ថម្ភធ្ងន់ធ្ងរកម្រិតខ្ពស់បំផុត៕
