លោក អាន់វ៉ា អ៊ីប្រាហ៉ីម នាយករដ្ឋមន្ត្រីម៉ាឡេស៊ី និងជាប្រធានអាស៊ាន នៅថ្ងៃទី២៧ ខែធ្នូ ឆ្នាំ២០២៥ បានប្រកាសស្វាគមន៍ ចំពោះ”បទឈប់បាញ់”រយៈពេល៧២ម៉ោង រវាងកម្ពុជា-ថៃ។
នៅលើ Facebook លោក អាន់វ៉ា បាននិយាយថា ការសម្រេចចិត្តបញ្ឈប់ការវាយប្រយុទ្ធគ្នា បានឆ្លុះបញ្ចាំងពីការទទួលស្គាល់ថា ការអត់ធ្មត់ជាតម្រូវការចាំបាច់ដើម្បីផលប្រយោជន៍នៃប្រជាជនស៊ីវិល។
សេចក្ដីថ្លែងការណ៍រួម បានគូសបញ្ជាក់ពីវិធានការជាក់ស្ដែង និងប្រកបដោយភាពវិជ្ជមាន ក្នុងនោះរួមមានទាំងការផ្ទៀងផ្ទាត់ដោយ ក្រុមអ្នកសង្កេតការណ៍អាស៊ាន និងការទំនាក់ទំនងគ្នាដោយផ្ទាល់ រវាងក្រុមមន្ត្រីអាជ្ញាធរការពារជាតិ។
ទាំងនេះបានផ្តល់ជាមូលដ្ឋានមួយសម្រាប់ស្ថិរភាព ហើយលោកផ្ទាល់សង្ឃឹមថា ភាគីទាំង២ កម្ពុជា និងថៃនឹងអនុវត្តតាមដោយភាពស្មោះត្រង់។
តាមលោក អាន់វ៉ា ខណៈម៉ាឡេស៊ីបានផ្ទេរតំណែងជាប្រធានអាស៊ានទៅឱ្យហ្វីលីពីន ដែលនឹងចូលជាធរមាននៅថ្ងៃទី១ ខែមករា ឆ្នាំ២០២៦ ម៉ាឡេស៊ីនឹងគាំទ្រដល់រាល់កិច្ចប្រឹងប្រែង ទាំងអស់ដើម្បីធានាថាកិច្ចប្រឹងប្រែងទាំងនោះត្រូវបានគោរព ហើយកិត្យានុភាព និងភាពគួរឱ្យទុកចិត្តបានរបស់អាស៊ានរួមទាំងសន្តិភាពក្នុងតំបន់ត្រូវបានថែរក្សា។
សូមជម្រាបថា កិច្ចព្រមព្រៀងឈប់បាញ់រយៈពេល៧២ម៉ោង គឺបានធ្វើឡើងកាលពីព្រឹកថ្ងៃទី២៧.១២.២០២៥ រវាងរដ្ឋមន្ត្រីការពារជាតិកម្ពុជា និងថៃ ដោយបានចូលជាធរមាន នៅម៉ោង១២ថ្ងៃត្រង់ក្នុងថ្ងៃទី២៧.១២.២០២៥៕