នៅថ្ងៃសៅរ៍ ទី២៧ ខែធ្នូ មេដឹកនាំកូរ៉េខាងជើង លោក គីម ជុងអ៊ុន បានគូសបញ្ជាក់ពីរបៀបដែលប្រទេសរបស់លោក និងរុស្ស៉ីបានរួមឈាម រួមរស់ និងរួមស្លាប់ក្នុងសង្រ្គាមអ៊ុយក្រែន នៅក្នុងសារជូនពរឆ្នាំថ្មីផ្ញើជូនប្រធានាធិបតីរុស្ស៉ី លោក វ្ល៉ាឌីមៀ ពូទីន។
ប្រភពពីសារព័ត៌មាន AFP។
ចារកម្មកូរ៉េខាងត្បូង និងលោកខាងលិចបានឱ្យដឹងថាទីក្រុងព្យុងយ៉ាងបានបញ្ជូនកងទ័ពជាង ១០ ០០០នាក់ទៅជួយជាកម្លាំងដល់កងទ័ពរុស្ស៉ីក្នុងសង្រ្គាមឈ្លានពានប្រឆាំងអ៊ុយក្រែន។ នៅក្នុងសារជូនពរឆ្នាំថ្មី ផ្ញើជូនលោក ពូទីន លោក គីម បាននិយាយថាឆ្នាំ២០២៥ ជាឆ្នាំដ៏មានអត្ថន័យសម្រាប់សម្ព័ន្ធភាពទ្វេភាគីដែលត្រូវបានពង្រឹងតាមរយៈការរួមឈាម រួមរស់ និងរួមស្លាប់ នៅក្នុងលេណដ្ឋានតែមួយ។
កូរ៉េខាងជើងបានទទួលស្គាល់ពីការបញ្ជូនកងទ័ពទៅជួយរុស្ស៉ីកាលពីខែមេសា ហើយកាលពីដើមខែធ្នូនេះ ទីក្រុងព្យុងយ៉ាងក៏បានទទួលស្គាល់ដែរថាខ្លួនបានបញ្ជូនកងទ័ពទៅជួយបោសសម្អាតមីនក្នុងតំបន់ Kursk របស់រុស្ស៉ី កាលពីខែសីហា ឆ្នាំ២០២៥។ លោក គីម បានផ្ញើសារជូនពរឆ្នាំថ្មីទៅកាន់លោក ពូទីន ធ្វើឡើងតែមួយថ្ងៃប៉ុណ្ណោះ បន្ទាប់ពីមេដឹកនាំកូរ៉េខាងជើងរូបនេះកាលពីថ្ងៃសុក្រម្សិលមិញបានចេញបញ្ជាឱ្យបង្កើន ការផលិតមីស៊ីល ដើម្បីបំពេញតម្រូវការដែលកំពុងកើនឡើង៕