លោក ដូណាល់ ត្រាំ ប្រធានាធិបតីអាមេរិក កាលពី(ថ្ងៃពុធទី៧ ខែមករា)បានអញ្ជើញប្រធានាធិបតីកូឡុំប៊ី លោក Gustavo Petro ដើម្បីមកធ្វើទស្សនកិច្ច នៅសេតវិមាន ។
បន្ទាប់ពីលោក ត្រាំ បានគំរាមមេដឹកនាំកូឡុំប៊ី ជាមួយការធ្វើសកម្មភាពយោធាជុំវិញការចោទប្រកាន់ពីការរត់ពន្ធគ្រឿងញៀន។
សារព័ត៌មាន AFP។
លោក ត្រាំ ធ្វើឡើងបន្ទាប់ពីរូបលោកបានបើកកិច្ចពិភាក្សាតាមទូរស័ព្ទ ជាមួយលោក Petro ដែលជាកិច្ចសន្ទនាតាមទូរស័ព្ទលើកដំបូងបំផុត រវាងមេដឹកនាំទាំង២ ចាប់តាំងពីលោក ត្រាំ ស្បថចូលកាន់តំណែងជាប្រធានាធិបតីអាមេរិកកាលពីខែមករាឆ្នាំមុនមក។
តាមលោក ត្រាំ រូបលោកមានគម្រោងជួបលោក Petro ក្នុងពេលអនាគតដ៏ខ្លី។
យោធាអាមេរិក បានបើកការវាយប្រហារលើវ៉េណេស៊ុយអេឡា កាលពីថ្ងៃសៅរ៍សប្ដាហ៍មុន និងបានចាប់ខ្លួនលោក នីកូឡាស់ ម៉ាឌូរ៉ូ និងភរិយារបស់លោកបញ្ជូនទៅ កាត់ទោសនៅសហរដ្ឋអាមេរិក។
ថ្លែងទៅកាន់ក្រុមអ្នកសារព័ត៌មាន នៅលើយន្ដហោះ Air Force One កាលពីថ្ងៃអាទិត្យចុងសប្ដាហ៍កន្លងទៅ លោក ត្រាំ ក៏បាន ព្រមានពីការធ្វើសកម្មភាពយោធាបែបនេះប្រឆាំងនឹងកូឡុំប៊ីផងដែរ។
លោក ត្រាំ បានចោទប្រកាន់ដោយមិនបានបង្ហាញភស្តុតាងថា មេដឹកនាំកូឡុំប៊ី មានជាប់ពាក់ព័ន្ធនឹង ការជួញដូរគ្រឿងញៀន ហើយបានដាក់ទណ្ឌកម្មហិរញ្ញវត្ថុលើលោក Petro និងក្រុមគ្រួសាររបស់លោកទៀតផង។
នៅពេលត្រូវបានសាកសួរថា តើការធ្វើអន្តរាគមន៍ យោធាប្រឆាំងវ៉េណេស៊ុយអេឡា អាចនឹងត្រូវបានអនុវត្តជាថ្មីលើកូឡុំប៊ីឬ? លោក ត្រាំ បានឆ្លើយថាវាស្ដាប់មើលទៅ គឺល្អសម្រាប់ខ្ញុំ។
លោក Petro បានអំពាវនាវឱ្យមានការធ្វើបាតុកម្មតវ៉ា នៅទូទាំងកូឡុំប៊ី កាលពីថ្ងៃពុធ ដើម្បីប្រឆាំងនឹងការសម្លុតគំរាមរបស់លោក ត្រាំ។
លោកបានរិះគន់ធ្ងន់ៗប្រឆាំងនឹងសហរដ្ឋអាមេរិក ប៉ុន្តែក្រោយកិច្ចពិភាក្សាតាមទូរស័ព្ទជាមួយលោក ត្រាំ លោក Petro ហាក់បន្ទន់ជំហរ និងបន្ថយសំឡេងវិញ៕