រដ្ឋបាលរបស់ប្រធានាធិបតីអាមេរិក លោក ដូណាល់ ត្រាំ បានប្រកាសដកសហរដ្ឋអាមេរិក ចេញពីអង្គការអន្តរជាតិចំនួន៦៦។
ដែលនេះគឺជាសញ្ញា នៃការកាត់ផ្ដាច់ខ្លួនកាន់តែខ្លាំងពីកិច្ចសហប្រតិបត្តិការពិភពលោក។
ទោះបីជាគេមិនទាន់បញ្ជាក់ឈ្មោះអង្គការទាំង៦៦ក៏ដោយ ប៉ុន្តែគេដឹងថា អង្គការទាំងនោះរួមមាន មូលនិធិអង្គការសហប្រជាជាតិសម្រាប់ប្រជាជន (UNFPA) និងអនុសញ្ញាក្របខ័ណ្ឌអង្គការសហប្រជាជាតិស្តីពីការប្រែប្រួលអាកាសធាតុ (UNFCCC) ជាដើម ។
ការសម្រេចចិត្តនេះធ្វើឡើង តាមរយៈបទបញ្ជាប្រតិបត្តិ ដែលលោកត្រាំ បានចុះហត្ថលេខាកាលពីថ្ងៃពុធ ដើម្បីផ្អាកការគាំទ្រ ក៏ដូចជាផ្អាកផ្ដល់ថវិកាដល់ទីភ្នាក់ងារ និងគណៈកម្មការនានា។
គោលដៅចម្បង រដ្ឋបាលរបស់លោកត្រាំ ចាត់ទុកថា អង្គការដែលផ្ដោតលើបញ្ហាអាកាសធាតុ ពលកម្ម និងការធ្វើចំណាកស្រុកទាំងនោះ ជាក្រុមដែលលើកកម្ពស់គោលនយោបាយបែបសង្គមនិយមជ្រុល។
រដ្ឋមន្ត្រីការបរទេសអាមេរិកលោក ម៉ាកូ រ៉ូប៊ីយ៉ូ (Marco Rubio) បញ្ជាក់ថា អង្គការទាំងនេះមានដំណើរការមិនល្អ បង្កឱ្យមានការខ្ជះខ្ជាយថវិកា និងត្រូវបានគ្រប់គ្រងដោយក្រុមដែលមានរបៀបវារៈផ្ទុយពីផលប្រយោជន៍អាមេរិក។
អង្គការខ្លះថែមទាំងបង្កការគំរាមកំហែងដល់អធិបតេយ្យភាព សេរីភាព និងវិបុលភាពរបស់សហរដ្ឋអាមេរិក។
ការដកខ្លួនចេញពីកិច្ចសហប្រតិបត្តិការអន្តរជាតិនេះ កើតឡើងស្របពេលដែលអាមេរិក កំពុងបង្កើនឥទ្ធិពលយោធាយ៉ាងខ្លាំង ដូចជាការចាប់ខ្លួនមេដឹកនាំវេណេហ្ស៊ូអ៊ីឡា និងបំណងចង់កាន់កាប់កោះហ្គ្រីនលែន (Greenland)ជាដើម៕