មន្ត្រីការទូតជាន់ខ្ពស់អាមេរិក ទទួលបន្ទុកតំបន់អាស៊ីបូព៌ា នៅថ្ងៃសុក្រទី៩ ខែមករា ឆ្នាំ២០២៦ បានលើកឡើងថា អាមេរិក នឹងផ្តល់ជំនួយចំនួន៤៥លានដុល្លារ ដល់កម្ពុជានិងថៃ ដើម្បីពង្រឹងកិច្ចប្រឹងប្រែងរបស់ប្រធានាធិបតី លោក ដូណាល់ ត្រាំ ក្នុងការជួយប្រទេសទាំងពីរ កសាងសន្តិភាពឡើងវិញ។
ព័ត៌មាន Reuters។
លោក Michael DeSombre មន្ត្រីអាមេរិក ទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក បានថ្លែងថា៖ អាមេរិក នឹងបន្តគាំទ្ររដ្ឋាភិបាលកម្ពុជា និងថៃ ស្របពេលដែលភាគីទាំងពីរ អនុវត្តកិច្ចព្រមព្រៀងសន្តិភាពគូឡាឡាំពួរ ហើយត្រួសត្រាយផ្លូវ ដើម្បីវិលត្រឡប់ទៅរកសន្តិភាព វិបុលភាព និងស្ថិរភាពឡើងវិញ សម្រាប់ប្រទេសទាំងពីរ ក៏ដូចជាសម្រាប់តំបន់ទាំងមូល។
លោក DeSombre អាមេរិក នឹងផ្តល់ថវិកាចំនួន១៥លានដុល្លារ សម្រាប់កិច្ចប្រឹងប្រែងស្តារស្ថិរភាព នៅតំបន់ព្រំដែន ដើម្បីជួយសហគមន៍មូលដ្ឋាន ស្តារជីវភាពរស់នៅឡើងវិញ និងគាំទ្រដល់អ្នកដែលបានភៀសខ្លួន ដោយសារជម្លោះនាពេលថ្មីៗនេះ។
ក្រៅពីនេះ ថវិកាចំនួន ១០លានដុល្លារ នឹងត្រូវផ្តល់សម្រាប់ការងារដោះ និងបោសសម្អាតអាវុធយុទ្ធភណ្ឌមិនទាន់ផ្ទុះ។
មិនតែប៉ុណ្ណោះ អាមេរិក ក៏នឹងផ្តល់ថវិកា ២០លានដុល្លារ សម្រាប់កិច្ចផ្តួចផ្តើមនានា ដើម្បីជួយកម្ពុជា និងថៃ ប្រយុទ្ធប្រឆាំងបទល្មើសឆបោកតាមអនឡាញ និងអំពើជួញដូរគ្រឿងញៀន ព្រមទាំងកម្មវិធីផ្សេងៗ។
បើតាមមន្ត្រីជាន់ខ្ពស់ម្នាក់ នៃក្រសួងការបរទេសសហរដ្ឋអាមេរិក លោក Michael DeSombre នឹងជួបពិភាក្សាជាមួយមន្ត្រីជាន់ខ្ពស់របស់ថៃ និងកម្ពុជា នៅទីក្រុងបាងកក និងទីក្រុងភ្នំពេញ នាថ្ងៃសុក្រ និងថ្ងៃសៅរ៍សប្តាហ៍នេះ ។
ដើម្បីពិភាក្សាអំពីការអនុវត្តកិច្ចព្រមព្រៀងសន្តិភាព ព្រមទាំងកិច្ចប្រឹងប្រែងទូលំទូលាយ ក្នុងការលើកកម្ពស់ផលប្រយោជន៍រួម នៅក្នុងតំបន់ឥណ្ឌូ-ប៉ាស៊ីហ្វិក៕